17.09c
Երեվան
չրք, մյս 06
Չինաստանի օրէնսդիր մարմինը կիրակի օր պաշտպանութեան նոր նախարար նշանակած է զօրավար Լի Շանկֆուն, յայտնած է «Xinhua» լրատուականը։
Երկրի օրէնսդիր մարմինը կիրակնօրեայ նստաշրջանի ընթացքին միաձայն հաստատած է զօրավար Լի Շանկֆուի նշանակումը։
CNN-ի հաղորդմամբ, արեւմտեան փորձագէտները նշած են, որ Ուաշինկթըն ուշադիր պիտի հետեւի նշանակման՝ հաշուի առնելով Լիի կենսագրութիւնը։
2018 թուականին Միացեալ Նահանգներու նախկին նախագահ Տանըլտ Թրամփի վարչակազմը պատժամիջոցներ կիրառած է Լիի եւ Չինաստանի սարքաւորումներու զարգացման բաժնի նկատմամբ, որ ան այնուհետեւ ղեկավարած է ռուսական զէնք գնելու համար, այդ շարքին՝ Սու-35 մարտական օդանաւեր եւ Ս-400 զենիթահրթիռային համակարգեր։
Լի Շանկֆուի՝ պաշտպանութեան նախարարի պաշտօնին նշանակուիլը տեղի կ'ունենայ Փեքինի եւ Ուաշինկթընի միջեւ լարուած յարաբերութիւններու ժամանակաշրջանին:
2016-ին Լին նշանակուած էր Չինաստանի ժողովրդական ազատագրական բանակի Ռազմավարական աջակցութեան ուժերու հրամանատարի տեղակալ, նախընտիր մարմին, որու խնդիրն էր արագցնել Չինաստանի տիեզերական եւ կիբեր ռազմական կարողութիւններու զարգացումը: Այնուհետեւ ան նշանակուած է Կեդրոնական ռազմական յանձնաժողովի (CMC) սարքաւորումներու մշակման բաժնի պետ՝ Չինաստանի առաջատար պաշտպանական մարմնի՝ Չինաստանի առաջնորդ Սի Ծինփինի գլխաւորութեամբ, հաղորդած է Reuters-ը:
Պաշտպանութեան փորձագէտները կը կարծեն, որ Լիի կենսագրութիւնը՝ որպէս գիտարուեստի փորձագէտ եւ օդատիեզերական ճարտարապետ, որ աշխատած է Չինաստանի արբանեակային ծրագրի համար, առանցքային դեր պիտի ունենայ անոր նոր պաշտօնին մէջ:
