22.09c
Երեվան
կրկ, հկտ 11
Անտրէյ Քարլով, որ զոհ դարձաւ երէկ Անգարայի մէջ տեղի ունեցած ահաբեկչական յարձակման, Թուրքիոյ մէջ իր դիւանագիտական առաքելութիւնն սկսած էր 2013 թուականին, որպէս ՌԴ դեսպան, կը գրէ «Անատոլու» գործակալութիւնը:
Քարլով ծնած է Մոսկուա, 1954թ.: 1976 թուականին ընդունուած է Մոսկուայի Միջազգային Յարաբերութիւններու ուսումնարան, եւ 1992 թուականին աւարտած է Դիւանագիտական Ակատեմիան: 1976 թուականէն Խորհրդային Միութեան, այնուհետեւ Ռուսիոյ Դաշնութեան Արտաքին Գործոց Նախարարութենէն ներս տարբեր պաշտօններ ստանձնած է:
Ան 1976-1981 եւ 1984-1990 թուականներուն զբաղեցուցած է Հիւսիսային Քորիայի մէջ Խորհրդային Միութեան դեսպանի պաշտօնը, ապա 1992-1997 եւ 2001-2006 թուականներուն նոյն երկրին մէջ Ռուսիոյ Դաշնութեան դեսպան նշանակուած է:
2007-2013 թուականներուն Ռուսիոյ Արտաքին Գործոց Նախարարութեան մէջ պաշտօնավարած է որպէս հիւպատոսական վարչութեան ընդհանուր տնօրէնի տեղակալ, ապա նաեւ ընդհանուր տնօրէն:
2013 թուականէն կը գործէր որպէս Թուրքիոյ մէջ Ռուսիոյ դեսպան: Ռուսերէնի կողքին կը տիրապետէր քորիերէնին եւ անգլերէնին: Ամուսնացած էր, ունէր որդի մը:
Յիշեցնենք, որ Քարլովի դէմ ահաբեկչութիւն գործած անձը Թուրքիոյ անվտանգութեան մարմիններու կողմէ սպաննուեցաւ նոյն ցուցահանդէսի շէնքին մէջ, ուր սպաննած էր դեսպանը:
