6.09c
Երեվան
շբթ, նմբ 15
Գերմանական հեղինակաւոր Bild պարբերականի գլխաւոր խմբագիրի տեղակալ՝ Փոլ Ռոնժեյմըր արձագանգած է Ատրպէյճանի նախագահ՝ Իլհամ Ալիեւի այն յայտարարութեան, որ իբրեւ թէ Ատրպէյճանի կողմէն Ստեփանակերտի խաղաղ բնակչութիւնը թիրախաւորելու մասին լրագրողներու հրապարակումները ապատեղեկատւութիւն են:
Ռոնժեյմըր իր «թուիթըր»եան միքրոպլոկով յայտարարած է, որ Ալիեւ կը ստէ:
«Միայն BBC-ն չէ, որ գիտէ, թէ նախագահը կրկին կը ստէ: Մենք այնտեղ ենք երկու շաբաթէ ի վեր: Գրեթէ ամէն օր եւ գիշեր տեսած եմ քաղաքացիական հատուածներու հրետակոծում: Կան բազմաթիւ լրագրողներ, որոնք կարող են ապացուցել, որ դուք կը ստէք»,-գրած է գերմանացին:
Bild-ի գլխաւոր խմբագիրի տեղակալը կիսուած է BBC-ի թղթակից՝ Օրլա Կուերինի գրառմամբ, ուր վերջինը մէջբերած է իր հետ հարցազրոյցի ընթացքին Ալիեւի խօսքերը առ այն, որ BBC-ի թղթակիցի սեփական աչքով տեսածը «կեղծ լուր է»:
Ատրպէյճանի զինուած ուժերու կողմէն Արցախի խաղաղ բնակիչները թիրախ դարձնելու փաստերը «կեղծ» անուանելու Ալիեւի խօսքերը քննադատութեան ալիք առաջացուցած են Արցախի մէջ կատարուածը իրենց աչքով տեսած միջազգային Զանգուածային Լրատուական միջոցներու ներկայացուցիչներուն մօտ: Ընկերային ցանցերը հեղեղուած են Ալիեւը խայտառակող գրառումներով:
