16.4c
Երեվան
չրք, հլս 01
Լիբանանեան տուրզի համայնքի ղեկավարներէն, Դեմոկրատական կուսակցութեան ղեկավար, նախկին նախարար Ուիամ Ուահապ, երէկ զգայացունց յայտարարութիւններ կատարեց:
Ուահապ, որ խօսեցաւ «Ալ-Մայատին» կայանէն, մասնաւորապէս նշեց, որ վերջին օրերուն տեղի ունեցած զարգացումներէն ետք, 8 Մարտի քաղաքական շրջանակներուն մէջ շատ աշխոյժ կերպով կը քննարկուի Հարիրիի վարչապետութեան պաշտօնին մնալու հարցը:
Ուիամ Ուահապ նաեւ ըսաւ, որ շաբաթ օր տեղի ունեցած միջադէպը նպատակ ունէր զինք ահաբեկել:
Ան նաեւ շեշտեց «Հըզպալլա» կուսակցութեան դերը, նշելով, որ շաբաթ օր տեղի ունեցած միջադէպին բոլոր մանրամասնութիւնները եւ այդ միջադէպին կապուած ապագայ զարգացումները այսօր յանձնուած են «Հըզպալլա»ին:
Յիշեցնենք, որ շաբաթ օր, Ուիամ Ուահապի «Ալ-Ժալիյէ» շրջանին մէջ եղած նստավայրին մօտ տեղի ունեցած էր զինեալ միջադէպ: Ապահովական մարմիններ, որոնք շրջան բարձրացած էին Ուահապին յանձնելու որոշում- հրամանագիր մը, չեն յաջողած իրենց գործը կատարել, Ուահապ հեռացած էր շրջանէն եւ կրակոցին արդիւնքով վիրաւորուած էր անոր թիկնապահներէն մին, որ նոյն օրը ուշ երեկոյեան աւանդած էր իր հոգին:
Այսօրուայ դրութեամբ, Ուիամ Ուահապ կը համարուի Հարիրիի գլխաւոր քննադատողներէն մին:
