• 418
• 09/02/2016

Հայ-Թուրք Երաժշտական Նոր Ծրագիր Պոլսոյ Մէջ

Բարեկամութեան շարժում ստեղծելու միտումով, Մար­մա­րիս Ֆիլ­հար­մո­նիի միութեան նա­խա­ձեռ­նու­թեամբ մշա­կուած է նա­խա­գիծ մը, ուր նախատեսուած է թուրք-հայ մշա­կու­թա­յին հա­մա­գոր­ծակ­ցու­թիւն իրականացնել: Նշեալ ծրագրի ծիրէն ներս ներ­կայ տա­րուան ըն­թաց­քին հա­մերգ­նե­րու շարք մը պիտի կազմակերպուի Թուր­քիոյ եւ ար­տա­սահ­մա­նի մէջ։
Այս ծրագրի ծանօթացման նպատակով շա­բաթ օ­ր տեղի ունեցած է մամ­լոյ ասուլի­ս մը, կազմակերպութեամբ Մար­մա­րի­սի Ֆիլ­հար­մո­նիի միու­թեան վարչութեան նախա­գահ Ահ­մէտ Եա­շար Ալ­թը­նէօզ, ծրագ­րի հա­մա­կար­գող Հիւ­սէ­յին Մու­րատ Կիւ­րոլ, խմբա­վար Նուարդ Անդ­րէա­սեան եւ «Ա­նա­տո­լու Քիւլ­թիւր»ի նախա­գահ Օս­ման Քա­վա­լա։
Հարկ է նշել, որ այս նա­խա­գի­ծը կը վա­յե­լէ Վար­չա­պե­տա­րա­նի եւ Մշա­կոյ­թի նախա­րա­րու­թեան զօ­րակ­ցու­թիւ­նը։ Ծրա­գի­րը պաշ­տօ­նա­պէս պի­տի սկսի Փետրուա­րի 22-ին եւ կեան­քի պի­տի կո­չուի տա­րուան ըն­թաց­քին։
«Քա­մե­րա­թա Սայ­կուն» եւ «Մար­մա­րիս» սե­նե­կա­յին նուա­գա­խում­բե­րուն մասնակցու­թեամբ պի­տի ի­րա­կա­նա­ցուին հա­մերգ­նե­րը։
Մամ­լոյ ա­սու­լի­սի ըն­թաց­քին ընդգ­ծուած է, թէ 1915-էն հա­րիւր տա­րի անց կազմակեր­պուած ո­գե­կո­չում­նե­րէն վերջ նա­խա­ձեռ­նողները կը ձգտին երաժշտութեան ճա­նա­պար­հով փո­խան­ցել բա­րե­կա­մու­թեան եւ համագործակցութեան պատ­գամ մը՝ ապ­րուած ցա­ւե­րու յաղ­թա­հար­ման նպատակով։
Նա­խա­ձեռ­նողները կը նա­խա­տե­սեն գե­ղա­րուես­տա­կան ու մշա­կու­թա­յին համերգներ կազ­մա­կեր­պել աշ­խար­հի այն քա­ղաք­նե­րուն մէջ, ուր մեծ թիւով հայերը կամ թուր­քե­ր կը բնակին։
Ծրագ­րին մէջ պիտի ներգ­րա­ւուին պատ­կան եր­կիր­նե­րու խորհր­դա­րա­նա­կան­նե­րը, հա­սա­րա­կա­կան գոր­ծիչ­նե­րը, զան­գուա­ծա­յին լրա­տուու­թեան մի­ջոց­նե­րու ներկայացու­ցիչ­նե­րը, գրող­նե­րը, պատ­մա­բան­նե­րը եւ ընդ­հան­րա­պէս թուրք եւ հայ ժո­ղո­վուրդ­նե­րը։
Հա­մերգ­նե­րու խմբա­վա­րի պա­տաս­խա­նա­տուու­թիւ­նը պի­տի ստանձ­նեն Նուարդ Անդ­րէա­սեան կամ Նե­զիհ Սեչ­քին։
Ծրագ­րին շրջագ­ծով կը նա­խա­տե­սուի հայ յօ­րի­նո­ղի մը գոր­ծե­րէն մէ­կուն թուրք մենա­կա­տա­րի մը կող­մէ մեկ­նա­բա­նուի­լը եւ հակառակը։
Ար­տա­սահ­մա­նի հա­մերգ­նե­րով կ՚են­թադ­րուի նպաս­տել թուրք եւ հայ հաւաքականու­թիւն­նե­րու մի­ջեւ երկ­խօ­սու­թեան ու փո­խա­դարձ հաս­կա­ցու­թեան։
Գե­ղա­րուես­տի ճա­նա­պար­հով բա­րե­կա­մու­թեան եւ երկ­կող­մա­նի դրա­կան յարաբերու­թիւն­նե­րու վե­րա­կեն­դա­նաց­ման ուղ­ղեալ այս նա­խա­ձեռ­նու­թիւ­նը միեւնոյն ժա­մա­նակ կը ձգտի ե­րաժշ­տու­թեան ճա­նա­պար­հով պայ­քա­րիլ ցեղապաշտու­թեան եւ մո­լե­ռան­դու­թիւն­նե­րու դէմ։
Հա­մերգ­նե­րու ժա­մա­նա­կա­ցոյ­ցը թէեւ վերջ­նա­կա­նօ­րէն չէ ճշդուած, սա­կայն յստ­ակ է, որ Գեր­մա­նիոյ, Ֆրան­սա­յի, Անգ­լիոյ, Հո­լան­տա­յի, Պել­ժիոյ եւ Ա­մե­րի­կա­յի Միացեալ Նա­հանգ­նե­րու մէջ տե­ղի պի­տի ու­նե­նան հա­մերգ­ներ։
Մամ­լոյ ա­սու­լի­սի ըն­թաց­քին բա­ցատ­րու­թիւն­ներ տրուած են նա­խա­տե­սուած երգացան­կին շուրջ, որոնց շար­քին ա­մե­նա­խորհր­դան­շա­կա­նը պի­տի ըլ­լայ Կոմիտասը։
Կազ­մա­կեր­պիչ­նե­րը մատ­նան­շած են, թէ ան­ցեա­լէն ժա­ռան­գուած ցա­ւե­րը ա­ռանց մո­ռա­ցու­թեան մատ­նե­լու զա­նոնք խա­ղա­ղու­թեան ու սի­րոյ վե­րա­ծե­լու հա­ւատ­քով ու նպա­տա­կով այս ճա­նա­պար­հոր­դու­թեան կը ձեռ­նար­կեն սոյն ծրագ­րով, ո­րով շուրջ տասն­հինգ ամ­սուան ժա­մա­նա­կաշր­ջա­նի մը մէջ տե­ղի պի­տի ու­նե­նայ տասն­հինգ հա­մերգ։ Հրա­ւէր ստա­նա­լու պա­րա­գա­յին կազ­մա­կեր­պիչ­նե­րը պատրաս­տա­կամ են նաեւ հա­մերգ ի­րա­կա­նաց­նել Հա­յաս­տա­նի մէջ։
Մար­մա­րի­սի Ֆիլ­հար­մո­նիի միու­թեան ներ­կա­յա­ցու­ցիչ­նե­րը հիւ­րըն­կա­լուած են Պատ­րիար­քա­կան Ընդ­հա­նուր Փո­խա­նորդ Տ. Ա­րամ Արք. Ա­թէ­շեա­նի կողմէ եւ մանրա­մաս­նու­թիւն­ներ փո­խան­ցած են մշա­կուած ծրագ­րին կա­պակ­ցու­թեամբ։ Նորին Սրբազ­նու­թիւ­նը գնա­հա­տած է դրա­կան ո­գիով մշա­կուած այս ծրագ­րին նախա­ձեռ­նարկ­նե­րը։

 Նիւթի աղբիւր՝ Ժամանակ

Միացիր մեզ Տելեգրամում

Սեղմել այստեղ

Միացիր մեզ Յութուբում

Սեղմել այստեղ

Միացիր մեզ Տելեգրամում

Միացիր մեզ Յութուբում

Կիսուիլ