22.09c
Երեվան
կրկ, հկտ 11
Բրիտանական «Էքոնոմիսթ» թերթը Թուրքիոյ վերջին զարգացումներուն վերաբերեալ ուշագրաւ յօդուածի մը մէջ գրած է, թէ Թուրքիոյ վերջին պայթումները պիտի նպաստեն իշխանութիւնը իր ձեռքերուն մէջ կեդրոնացնելու Էրտողանի ջանքերուն:
«Թուրքիոյ նախագահ Ռեճեպ Թայիպ Էրտողան կը կարծէ, որ Թուրքիոյ մէջ ստեղծուած խառնաշփոթի կարգաւորման միակ միջոցը՝ ամբողջ իշխանութիւնը իր ձեռքերուն մէջ կեդրոնացնելն է: Ահաբեկչական այդ գործողութենէն միայն քանի մը ժամ առաջ, վարչապետ Պինալի Եըլտըրըմ հրապարակեց սահմանադրական փոփոխութիւններու առաջարկը, որ առիթ կ՛ընծայէ նախագահին՝ իրագործելու այդ նպատակը: Արդարեւ, առաջարկուած փոփոխութիւններէն ետք, վարչապետի պաշտօնը պիտի ջնջուի, իսկ երկրի նախագահութիւնը պիտի ստանայ գործադիր մարմինի կարգավիճակ: Այդպիսով, Էրտողան իրաւունք պիտի ունենայ բարձրաստիճան պաշտօնեաներ նշանակելու, արտակարգ դրութիւն յայտարարելու եւ օրէնքի ուժ ունեցող որոշումներ հրապարակելու: Այս նպատակով յառաջիկայ գարնան իրականացուելիք հանրաքուէէն առաջ, նախագիծը պէտք է վաւերացուի խորհրդարանին կողմէ», կը գրէ թերթը:
Յօդուածին մէջ նաեւ կը նշուի, որ Յուլիս 15ի ձախողած յեղաշրջման փորձը իբրեւ պատրուակ կ՛օգտագործուի՝ աւելի քան 40,000 կասկածելիներու ձերբակալութիւնը արդարացնելու համար:
«Էրտողան կը կարծէ, որ միայն ի՛նք կրնայ Թուրքիոյ տարածքին տիրող քաոսը զսպել, մինչդեռ այդ քաոսին պատճառներէն մէկը ի՛նքն է: Էրտողան դադրեցուց Քիւրտիստանի բանուորական կուսակցութեան հետ սկսած հաշտութեան բանակցութիւնները եւ, ի պատասխան ապահովական ուժերուն վրայ քրտական յարձակումներուն՝ կալանաւորեց քիւրտ քաղաքական գործիչներ, առաւել բորբոքելով լարուածութիւնը: Ան փոշիացուց հարաւարեւելեան քաղաքները՝ տեղահան ընելով մօտաւորապէս 500,000 բնակիչ», կ՛եզրակացնէ թերթը:
