20.09c
Երեվան
երկ, հլս 28
Շիրակի թեմի առաջնորդ Միքայէլ արքեպիսկոպոս Աջապահեանն ու «Սրբազան պայքար» շարժման առաջնորդ Բագրատ արքեպիսկոպոս Գալստանեանը յուլիս 5-ին մէկօրեայ հացադուլ պիտի յայտարարեն, յայտնած է Աջապահեանի պաշտպանական խումբը՝ ներկայացնելով կալանավայրէն անոր տարածած յայտարարութիւնը։
«ՀՀ Սահմանադրութեան օրուան առիթով՝ մեր նկատմամբ ընթացող հակասահմանադրական գործընթացը դատապարտելով, մենք՝ Միքայէլ եւ Բագրատ սրբազաններս, յուլիս 5-ին յայտարարում ենք մէկօրեայ հացադուլ»,-ըսուած է յայտարարութեան մէջ։
Միքայէլ Աջապահեանը կալանաւորուած է երկու ամիսով՝ ՀՀ քրէական օրէնսգրքի 422-րդ յօդուածի 2-րդ մասով։ Ըստ Քննչական կոմիտէի՝ ան զանգուածային լրատուամիջոցներու եւ տեղեկատուական արհեստագիտութիւններու միջոցով տարածած է կոչեր, որոնք, ըստ մեղադրանքի, ուղղուած եղած են իշխանութեան իւրացման եւ սահմանադրական կարգի տապալման։
Բագրատ արքեպիսկոպոս Գալստանեանը նոյնպէս կալանաւորուած է երկու ամիսով։ Անոր նկատմամբ քրէական վարոյթ յարուցուած է ՀՀ քրէական օրէնսգիրքի միաժամանակ երեք յօդուածներով՝ ահաբեկչութիւն, զանգուածային անկարգութիւններ եւ իշխանութեան զաւթում նախապատրաստելու յատկանիշներով։
Երկու հոգեւորականներն ալ չեն ընդունիր իրենց առաջադրուած մեղադրանքները՝ անոնք որակելով որպէս քաղաքական հետապնդում։
