18.09c
Երեվան
հնգ, սպտ 19
Արցախի մայրաքաղաքին մէջ անյայտ անձ մը արձակազէն հրացանով կրակ բացաւ հսկողութիւն կատարող ռուս-ատրպէյճանական միացեալ խումբին վրայ: Այս մասին կը հաղորդուի Արցախի մէջ ռուսական խաղաղապահ զօրախումբի գործունէութեան մասին Ռուսիոյ պաշտպանութեան նախարարութեան ամէնօրեայ տեղեկագիրին մէջ:
«Տուժածներ չկան: Ռուս խաղաղապահ զօրախումբի հրամանատարութիւնը ատրպէյճանական կողմի եւ Ղարաբաղի ներկայացուցիչներուն հետ քննութիւն կը կատարէ՝ տուեալ փաստով», կը նշուի տեղեկագիրին մէջ:
Մոսկուա կը վստահեցնէ նաեւ, թէ ռուսական խաղաղապահ զօրախումբը կը շարունակէ առաքելութիւնը Լեռնային Ղարաբաղի տարածքին: «Անընդհատ կապ կը պահպանուի Պաքուի եւ Ստեփանակերտի միջեւ՝ արիւնահեղութիւն թոյլ չտալու, ապահովութեան երաշխաւորման եւ խաղաղ բնակչութեան նկատմամբ մարդասիրական իրաւունքի սկզբունքներու պահպանման ուղղութեամբ», կ՛ըսուի տեղեկագիրին մէջ:
