-5.91c
Երեվան
երք, դկտ 23
Լաչինի միջանցքի 8 ամիս շարունակ արգելափակուած ըլլալու պայմաններուն մէջ՝ դեղորայքի ու սնունդի խիստ սղութեամբ եւ շարունակական լարումով պայմանաւորուած՝ շրջափակուած Արցախի մէջ նախորդ տարուան համեմատ աճած են շարք մը հիւանդութիւններու եւ բարդութիւններու ցուցանիշները։ Այս մասին յայտնած է Արցախի առողջապահութեան նախարարութիւնը։
Գերատեսչութեան յայտարարութիւնը ամբողջութեամբ կը ներկայացնենք ստորեւ.
«Եօթ ամսուայ (յունուար-յուլիս) ընթացքում արեան շրջանառութեան համակարգի հիւանդութիւններից արձանագրուել է մահացութեան աճ՝ աւելի քան 2 անգամ, ներառեալ՝ սուր եւ քրոնիկ սրտային անբաւարարութիւնից մահերի աճ՝ 66%-ով, սրտամկանի սուր ինֆակտից՝ 20,8%-ով, ուղեղի կաթուածից՝ 8,8%-ով։
Յուլիս ամսուայ ընթացքում արեան շրջանառութեան համակարգի հիւանդութիւններից մահուան դէպքերն էլ աւելի են աճել՝ հասնելով նախնականօրէն 2.6 անգամի՝ նախորդ տարուայ յուլիս ամսուայ համեմատ, ներառեալ՝ սուր սրտային անբաւարարութիւնից մահեր՝ աճ 2.5 անգամ, սրտամկանի սուր ինֆակտից՝ 4 անգամ, Ուղեղի կաթուածից՝ 3 անգամ:
Եօթ ամսում չարորակ նորագոյացութիւններից մահերի քանակը աճել է 15,9%-ով։ Մահացութեան դէպքերի աւելացման պատճառներից են անհրաժեշտ դեղորայքի սղութիւնը կամ բացակայութիւնը, կեանքի որակի փոփոխութիւնը, պատշաճ բուժօգնութեան հնարաւորութիւնների խիստ սահմանափակութիւնը, որոնք կրճատում են ապրելիութեան աստիճանը։
Նոյն ժամանակահատուածում բնակչութեան շրջանում արձանագրուել է գլխուղեղի արեան շրջանառութեան սուր խանգարման (ուղեղի կաթուած) եւ սրտամկանի սուր ինֆակտի նոր դէպքերի աճ՝ համապատասխանաբար 26%-ով եւ 9,7%-ով։
Յունուար-յուլիս ժամանակահատուածում արձանագրուել է չարորակ նորագոյացութիւնների նոր յայտնաբերուած դէպքերի աճ՝ 24,3%-ով:
Յունուար-յուլիս ամիսների ընթացքում, նախորդ տարուայ նոյն ժամանակահատուածի համեմատ, բժիշկների հսկողութեան տակ գտնուող յղի կանանց շրջանում սակաւարիւնութեան մակարդակը հասել է մօտ 90%-ի։ Դա պայմանաւորուած է ոչ լիարժէք սննդով եւ համապատասխան դեղամիջոցների սղութեամբ կամ բացակայութեամբ։
Չնայած առաջին կիսամեակի ընթացքում ընդհանուր վիժումների քանակի աճ չի արձանագրուել, սակայն յուլիս ամսում արձանագրուել է բժշկի ցուցումով վիժումների կտրուկ աճ՝ 4 անգամ։ Ցաւալի իրավիճակին նպաստում են սթրեսը, ոչ լիարժէք սնունդը եւ դեղորայքի սղութիւնը կամ բացակայութիւնը։
Հանրապետութեան Շտապ օգնութեան ծառայութեան մօտ յուլիս ամսուն յաճախակի դարձած են ուշագնացութեան դէպքերը։ Նախորդ տարուայ յուլիս ամսուայ համեմատ ուշագնացութեան դէպքերը աճել են 91%-ով։ Շատ յաճախ լինում են դէպքեր, երբ կայ ուշագնացութիւն, սակայն մինչեւ շտապ օգնութեան անձնակազմի ժամանումը, քաղաքացուն ուշքի են բերում, եւ փաստացի չի գրանցւում դէպքը:
Յուլիս ամսում, նախորդ տարուայ նոյն ժամանակահատուածի հետ համեմատ, արձանագրուել է նաեւ զարկերակային գերճնշման դէպքերի պատճառով շտապ օգնութեան կանչերի կտրուկ՝ 5.6 անգամ աճ»։
