10.09c
Երեվան
ուրբ, հկտ 18
Աշխատանքային այցով Պաքու ժամանած Ռուսիոյ արտաքին գործոց նախարարը, այսօր խօսելով ղարաբաղեան հակամարտութեան մասին, ըսած է, թէ «հակամարտութեան կողմերը եւ միջնորդները աւելի մօտ են «յաջողութեան հեռանկարին»»: Նշենք, որ Լավրով այս կեցուածքով հանդէս եկած է ազրպէյճանցի իր գործընկերոջ հետ կայացած համատեղ մամլոյ ասուլիսի ատեն: «Հասկանալի պատճառներով մենք հրապարակայնօրէն չենք քննարկեր այն գաղափարներու մանրամասնութիւնները, որոնք կը քննարկուին նախագահներու ու ԱԳՆ ղեկավարներու հանդիպումներուն: Սէյնթ Փեթերսպուրկի հանդիպման աւարտին երեք նախագահները պայմանաւորուած են, որ զգոյշ պիտի վարուին յառաջացած յոյսի նշոյլներուն հետ, որպէսզի բաց չձգեն պահը, եւ մեկնաբանութիւնները ընդհանուր բնոյթ պիտի կրեն, առանց մանրամասնութիւններու: Ատիկա որեւէ բանակցային գործընթացի բարոյական օրէնքն է, եւ ես յոյս ունիմ, որ մենք պիտի հետեւինք ատոր: Մենք հիմքեր ունինք կարծելու, որ այս անգամ աւելի մօտեցած ենք յաջողութեան հեռանկարին, քան առաջ էր», – յայտարարած է Լաւրով: Իր հերթին, Ազրպէյճանի ԱԳՆ ղեկավար Էլմար Մամետեարով յայտարարած է. «Ընթացող բանակցութիւնները առարկայական են, բովանդակալից, եւ մենք յոյս ունինք, որ չլուծուած հարցերու շուրջ հետեւողական քննարկումներու պարագային պիտի կարենանք զգուշաւոր լաւատեսութեամբ նայիլ դէպի ապագան»:
