4.09c
Երեվան
հնգ, փտր 26
Ֆրանսայի նախագահ Էմանուէլ Մաքրոն հեռուստատեսային ուղերձով պիտի դիմէ ժողովուրդին, քանի որ «Քորոնա» ժահրի վարակի երրորդ ալիքը, որ արագօրէն կը տարածուի ամբողջ երկրին մէջ, կը սպառնայ ծանրաբեռնել տեղի հիւանդանոցները: Այս մասին տեղեկացուցած է EADaily լրատուականը` յղում տալով Էլիզեան պալատին:
Միեւնոյն ժամանակ, Հինգերորդ հանրապետութեան ղեկավարի վարչակազմը չէ յստակեցուցած`արդեօք Էմանուէլ Մաքրոնը պիտի յայտարարէ համավարակի դէմ պայքարի հետագայ սահմանափակումներու մասին` Ֆրանսայի մէջ Covid-19-էն մահացութիւններու ընդհանուր թիւի 100,000 շեմին մօտեցման առընթեր:
Անցեալ երեքշաբթի օր վերակենդանացման բաժանմունքներուն մէջ Covid-19-ով ախտորոշուած հիւանդներու թիւն աճած է 98-ով՝ գերազանցելով 5000-ի շեմը, որ այս տարուայ ամենաբարձր ցուցանիշն է: Հանրային առողջապահութեան մասնագէտները նշած են, որ ֆրանսական հիւանդանոցներուն մէջ վերակենդանացման բաժանմունքներու ծանրաբեռնուածութիւնը կը վկայէ այն մասին, որ ներկայիս սահմանափակումները բաւարար չեն:
Արեւմտեան Եւրոպայի ամենամեծ երկրին մէջ դեկտեմբերի կէսէն կը գործէ գիշերային պարէտային ժամ, իսկ որոշ շրջաններու մէջ, ներառեալ Փարիզը, քաղաքացիներու տեղաշարժը զգալիօրէն սահմանափակուած է: Պարերը, ճաշարաններն ու թատրոնները քանի ամիս է փակ են: Փարիզի քաղաքապետ Անն Իտալկոն աւելի վաղ BFM հեռուստաընկերութեան տուած հարցազրոյցին մէջ ըսած էր, որ դպրոցները նոյնպէս հարկաւոր է փակել:
