31.09c
Երեվան
չրք, հնս 26
ՆԱԹՕ-ի անդամ երկիրները խորհրդակցութիւններ սկսած են միջուկային զէնքը մարտական պատրաստութեան վիճակի բերելու անհրաժեշտութեան շուրջ։ Այս մասին բրիտանական The Daily Telegraph թերթին տուած հարցազրոյցին յայտարարած է դաշինքի գլխաւոր քարտուղար Հանս Սթոլթընպերկը։
«Ես չեմ մանրամասներ, թէ քանի միջուկային մարտագլխիկ պէտք է աշխատանքային վիճակի բերուի եւ ինչպէս ատոնք պէտք է պահուին, բայց մենք պէտք է խորհրդակցինք այս հարցերու շուրջ: Եւ մենք այժմ այդ է որ կ՚ընենք», -ըսած է ան:
Սթոլթընպերկ ըսած է, որ այս հարցով թափանցիկութիւնը «կ՚օգնէ յստակ ուղերձ յղելու», որ ՆԱԹՕ-ն «միջուկային դաշինք է»:
«ՆԱԹՕ-ի նպատակն է ունենալ աշխարհ առանց միջուկային զէնքի, բայց քանի դեռ կայ միջուկային զէնք, մենք կը մնանք միջուկային դաշինք, քանի որ աշխարհը, ուր Ռուսիան, Չինաստանը եւ Հիւսիսային Քորէան միջուկային զէնք ունին, իսկ ՆԱԹՕ-ն չունի, վտանգաւոր աշխարհ է», - նշած է Սթոլթընպերկը։
Ան աւելցուցած է, որ իրեն յատկապէս կ՚անհանգստացնէ Չինաստանը, որ մեծ ներդրումներ կը կատարէ ժամանակակից սպառազինութիւններու ստեղծման համար եւ մտադիր է մինչեւ 2030 թուականն իր միջուկային մարտագլխիկներու թիւը հասցնել հազարի։
«Սա կը նշանակէ, որ առաջիկային ՆԱԹՕ-ն կրնայ բախուիլ նախկին աննախադէպ իրավիճակի՝ երկու հաւանական միջուկային հակառակորդի՝ ի դէմս Չինաստանի եւ Ռուսիոյ, որ կը յանգեցնէ հետեւանքներու»,- կը կարծէ գլխաւոր քարտուղարը։
Սթոլթընպերկ ըսած է, որ Միացեալ Նահանգները եւ անոր եւրոպացի դաշնակիցները այժմ կը թարմացնեն իրենց միջուկային զինանոցները։
Խօսելով Ուքրանիոյ մէջ տիրող իրավիճակի մասին՝ Սթոլթընպերկ կոչ ըրած է արեւմտեան երկիրներուն շարունակելու օգնութիւն ցուցաբերել Քիեւին։
«Ես միանգամայն համոզուած եմ, որ եթէ Փութինը յաղթէ Ուքրանիոյ մէջ, ապա մենք աւելի խոցելի պիտի ըլլանք, եւ այդ ժամանակ մենք պէտք է աւելի շատ ներդրումներ կատարենք մեր պաշտպանութեան համար», - եզրափակած է ան:
