14.09c
Երեվան
կրկ, մյս 03
Վարչապետ Նիկոլ Փաշինեան շնորհաւորական ուղերձ յղած է Աշխատանքի եւ աշխատաւորներու համերաշխութեան միջազգային օրուան առթիւ.
«Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,
Մայիսի 1–ին նշում ենք Աշխատանքի եւ աշխատաւորների համերաշխութեան միջազգային օրը, եւ ուզում եմ բոլորիս շնորհաւորել օրուայ առիթով։
Քաղաքակրթութիւնը ձեւաւորուել ու զարգանում է աշխատանքի արդիւնքում, եւ աշխատանքն է այն գործիքը, որով հնարաւոր է անհատի եւ հանրութեան կեանքն աւելի լաւը դարձնել։ Ասուածի մէջ բանալի արտայայտութիւնը «հնարաւոր է»–ն է։ Աշխատանքն, ի հարկէ, անհատի եւ հանրութեան կեանքն աւելի լաւը դարձնելու անհրաժեշտ, բայց ոչ բաւարար պայման է, որովհետեւ գոհացուցիչ արդիւնքներ բերում է միայն արդիւնաւէտ աշխատանքը, իսկ արդիւնաւէտ լինելու համար աշխատանքը պէտք է հիմնուած լինի գիտելիքի, շարունակաբար զարգացող հմտութեան, այսինքն՝ կրթութեան ու կրթուելու վրայ։
Սովորաբար, երբ ասում ենք կրթութիւն, գիտելիք, գիտելիքահենք աշխատանք, ասոցիատիւ հասկանում ենք գիտատեխնիկական, տեխնոլոգիական, հետազօտական աշխատանք, ինչը, ի հարկէ, սխալ չէ։
Բայց ցանկացած աշխատանք շատ աւելի արդիւնաւէտ է, երբ հիմնուած է տուեալ աշխատանքի, նրա նրբութիւնների եւ առանձնայատկութիւնների մասին սեփական գիտելիքն ընդլայնելու եւ հարստացնելու գործելակերպի վրայ։ Սա վերաբերում է ամէն ինչին՝ արհեստին, արուեստին, ձեռներեցութեանը, գիւղատնտեսութեանը, մանկավարժութեանը, պետական, զինուորական, համայնքային ծառայութեանը, բանուորութունն ու առաջնորդութեանը, եւ բարեկեցութեան հասել ու հասնում են այն պետութիւնները եւ հանրութիւնները, որոնք առաջնորդւում են այս տրամաբանութեամբ։
Կառավարութիւնն ու կառավարող մեծամասնութիւնը Հայաստանի Հանրապետութիւնն առաջնորդում են այս տրամաբանութեամբ, հասկանալով, որ սա պարզ ճանապարհ չէ, որովհետեւ խօսել գիտելիքն ընդլայնելու, հմտութիւնը զարգացնելու անհրաժեշտութեան մասին, նշանակում է արձանագրել, որ մենք ինչ–որ բան չգիտենք։
Ու երբեմն անհատական, հանրային, պետական մակարդակով հեշտ չէ խոստովանել, որ մենք ինչ–որ բան չգիտենք, չնայած ակնյայտ է, որ բոլոր տեղերում բոլորն ինչ–որ բան չգիտեն։ Եւ թերեւս մենք պէտք է ուժ ունենանք խոստովանելու, որ մենք վատ ենք ապրում մեր չիմացածի չափով եւ լաւ ապրում ենք մեր իմացածի չափով, եւ մեր բարեկեցութիւնն ընդլայնելու համար մեզ պէտք է փոքրացնել մեր չիմացածի ծաւալը եւ ընդլայնել մեր իմացածի ծաւալը, իսկ սա հնարաւոր է աշխատանքի եւ կրթութեան, կրթութեան եւ աշխատանքի ամենասերտ փոխկապակցման միջոցով։
Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,
Շնորհաւորում եմ բոլորիդ Աշխատանքի եւ աշխատողների համերաշխութեան օրուայ առիթով եւ ցանկանում եմ, որ աշխատանքն արդիւնքի վայելում եւ ստեղծագործական բերկրանք նշանակի մեր բոլոր քաղաքացիների, մեր հանրութեան համար, որովհետեւ աշխատանքը պէտք է լինի արդիւնք ստեղծելու եւ այդ արդիւնքը վայելելու միջոց։
Եւ կեցցէ՛ Հայաստանի Հանրապետութիւնը»։
