Արեվելք - Արևելք լրատուական

933
06/03/2022

Կիրակի է, եկէք «Ազգային լոգանք» մը առնենք

Բարի լոյս ձեզ այս կիրակի,

Ինչպէ՞ս էք , յուսամ լաւ էք ։

Այսօր Ես մասնաւոր ըսելիք մը չունիմ ձեզի , քիչ մըն ալ դուք պատմեցէք։

- Ինչ պիտի պատմենք ազգային բժիշկ... Չե՞ս տեսներ, հայրենիքը վիրաւոր է , աշխարհը խանգարուած է , ամէն տեղ պատերազմ է , համատարած սղութիւն է , անգործութիւնը գլուխը առած է , ամէն ինչ այնքան գէշ է.... ըսէ մեզի , ասոր վերջը արդեօք ինչ է...

- Ես ի՞նչ գիտնամ վերջը ինչ է... Եթէ ըսեմ վերջը լաւ է , կը հաւատա՞ք .... Կամ ալ եթէ ըսեմ վերջը գէշ է , կրնա՞յ ըլլալ զգաստանաք։

Անկեղծօրէն եթէ կ'ուզէք , ես վերջով այնքան ալ հետաքրքրուած չեմ։ Այսինքն մինչեւ վերջ մնալու ցանկութիւն ալ չունիմ, մանաւանդ որ վերջը յայտնի չէ երբ է , կրնայ ըլլալ նոյնիսկ այս բոլորը անվերջ է։

Այնպէս որ զիս հետաքրքրողը աւելի շատ իմ այսօրն է , մանաւանդ որ կիրակի է , թէեւ օդը անձրևոտ է բայց ինչ վնաս, պիտի իջնեմ պարտէզս մաքրեմ, որովհետեւ ես աւելի շատ մաքրութեան կողմանկից եմ ։

Պարտէզս պիտի մաքրեմ յետոյ ցեխոտ կօշիկներս դուրսը պիտի հանեմ ու տուն մտնեմ որպէսզի ցեխոտ ոտքերով իմ սեփական տունս չաղտոտեմ։ Յետոյ լոգանք մը պիտի առնեմ, անշուշտ ակռաներս ալ պիտի մաքրեմ, նաեւ լեզուս, կոկորդս նոյնիսկ ուղեղս պիտի լաւ մը խոզանակեմ ... Թէեւ խիղճս մաքուր է բայց անոր վրայի փոշին ալ պիտի առնեմ եւ այսպէս մաքուր խղճով, մաքուր մտքով ու մարմնով ես իմ օրս պիտի վայելեմ։

Ինչ վնաս եթէ վաղը երկուշաբթի է եւ օրը պզտիկ հայհոյանքով մը պիտի սկսինք, բայց շաբաթ անգամ մը եթէ ազգովին այսպէս մէյ մը մաքրուինք, հաւատացէք հայրենքն ալ կը բուժենք ու մենք մեր ազգը աշխարհի խանգարումէն զերծ կը պահենք։

Ուրեմն եկէք այս կիրակի ազգային լոգանք մը առնենք ։ Վերջին անգամ ե՞րբ մաքրութեան ենթարկուած ենք, մէկն ու մէկս կը յիշե՞նք...

Ես չեմ յիշեր.... Երեւի Հայկ նահապետին հարցնենք։