15.09c
Երեվան
չրք, փտր 18
Այսօր` Փետրուար 21-ին, Ազգային ժողովի արտաքին յարաբերութիւններու մշտական յանձնաժողովը չաջակցեցաւ Ատրպէյճանի եւ Թուրքիոյ կողմէ վաւերացրած այսպէս կոչուած «Շուշիի հռչակագրի»ն վերաբերեալ «Հայաստան» խմբակցութեան ներկայացուցած յայտարարութեան նախագիծին: «Կողմ» քուէարկեց 4 պատգամաւոր, իսկ «Քաղաքացիական պայմանագիր» խմբակցութեան 6 պատգամաւոր ձեռնպահ մնաց:
Յայտարարութեան նախագածին մէջ մասնաւորապէս կ'ըսուի.
«Հայաստանի Հանրապետութեան Ազգային ժողովը խորին մտահոգութիւն է յայտնում Ատրպէյճանի եւ Թուրքիայի խորհրդարանների կողմից բռնագրաւուած Շուշի քաղաքում 2021 թուականի Յունիսի 15-ին Թուրքիայի եւ Ատրպէյճանի նախագահների կողմից ստորագրուած հռչակագրի վաւերացման կապակցութեամբ:
Հռչակագրով հաստատուել է թուրք-ատրպէյճանական ռազմաքաղաքական միութիւնը «մէկ ազգ` երկու պետութիւն» հայեցակարգի շրջանակում:
Թէեւ փաստաթղթում ասւում է, որ այն չի ստեղծուել երրորդ կողմի դէմ, այնուամենայնիւ, դրա ողջ բովանդակութիւնն ուղղուած է Հայաստանի, Արցախի եւ հայ ժողովրդի դէմ: Այն ամրագրում է Արցախի դէմ 44-օրեայ ծաւալած երկու պետութիւնների ռազմավարական նպատակները` ուղղուած Արցախի ժողովրդի ինքնորոշման, Հայաստանի ինքնիշխանութեան եւ տարածքային ամբողջականութեան, ինչպէս նաեւ Ցեղասպանութիւն վերապրած եւ ամբողջ աշխարհում սփռուած հայ ժողովրդի իրաւունքների դէմ:
Հռչակագրում օգտագործուած «Զանգեզուրի միջանցք» ձեւակերպումը ցոյց է տալիս, որ Թուրքիան եւ Ատրպէյճանը հրապարակաւ պայմանաւորուածութիւններ են ձեռք բերում համատեղ էքսփանսիոնիստական ծրագրերի իրականացման շուրջ:
Դատապարտման է արժանի նաեւ երկու պետութիւնների կողմից ձեռք բերուած պայմանաւորուածութիւնը` Հայոց ցեղասպանութեան միջազգային ճանաչման դէմ համատեղ պայքարի հարցում, որը ենթադրում է հարցի բովանդակութեան խեղաթիւրում եւ տեղափոխում պատմական ուսումնասիրութիւնների դաշտ:
«Շուշիի հռչակագիրը» հիմնուած է ոչ թէ ՄԱԿ-ի կանոնադրութեան կամ ԵԱՀԿ-ի ընդունած անվտանգութեան սկզբունքի, այլ «ցեղապաշտական անվտանգութեան» մօտեցման վրայ: Սա հակասում է միջազգային իրաւունքի հիմնական կանոններին: Համաձայն 1969թ․ միջազգային պայմանագրերի իրաւունքի մասին Վիեննայի ուխտի` միջազգային բոլոր պայմանագրերը, որոնք հակասում են ընդհանուր միջազգային իրաւունքի կանոններին, առոչինչ են եւ չեն կարող ունենալ որեւէ միջազգային օրինականութիւն:
Հայաստանի Հանրապետութեան Ազգային ժողովը յայտարարում է.
«Շուշիի հռչակագիրը լրջագոյն մարտահրաւէր է տարածաշրջանային ու համաշխարհային անվտանգութեանը, չի նպաստում մեր տարածաշրջանի խաղաղ զարգացմանը, հակասում է «առանց նախապայմանների» սկզբունքի հիման վրայ հայ-թուրքական յարաբերութիւնների կարգաւորմանը ու լուրջ կասկածներ առաջացնում պաշտօնական Անգարայի իրական վարքագծի ու մտադրութիւնների առումով»:
