23.09c
Երեվան
շբթ, սպտ 14
Հայց. Առաքելական Եկեղեցւոյ Իրաքի Թեմի Առաջնորդ Հոգշ. Տ. Օշական Վրդ. Կիւլկիւլեան օրերս այցելութիւն մը տուած է Հալէպ եւ այցելած Բերիոյ Թեմի Ազգային Առաջնորդարան։
Երկար տարիներէ ի վեր առաջին անգամն է, որ Իրաքի Թեմի Առաջնորդ մը կ՚այցելէ Հալէպ քաղաք եւ կը հանդիպի տեղի պատկան մարմիններուն։
Այցելութեան մասին մանրամասն գրած է Բերիոյ Հայոց Թեմի դիմատետրի պաշտօնական էջը, ուրկէ կը կարդանք՝
Երկուշաբթի, 20 Մարտ 2023-ի առաւօտուն, Բերիոյ Հայոց Թեմի Բարեջան Առաջնորդ Գերշ. Տ. Մակար Սրբ. Եպս. Աշգարեան Ազգ. Առաջնորդարանի իր գրասենեակէն ներս ընդունեց զօրակցական այցելութիւնը Իրաքի Հայոց Թեմի Առաջնորդ Հոգշ. Տ. Օշական Վրդ. Կիւլկիւլեանի, որուն կ՚ընկերակցէր Պասրայի եկեղեցւոյ Թաղական Խորհուրդի ատենապետ տիար Խաժակ Վարդանեան։ Հանդիպումին ներկայ գտնուեցան նաեւ Ազգ. Վարչութեան անդամ տիար Մանուէլ Տէր Մանուէլեան եւ Յարաբերական յանձնախումբի անդամ տիար Վրէժ Եագուպեան։
Եղբայրական ջերմ մթնոլորտի մէջ ընթացող հանդիպումին Իրաքի Հայոց Թեմի Առաջնորդը իրազեկ դարձաւ երկրաշարժէն ետք տիրող իրավիճակին եւ Իրաքի Հայոց Թեմին ու իրաքահայութեան օժանդակութիւնը յանձնելով Սրբազան Հօր՝ ցաւակից եղաւ եւ զօրակցութիւն յայտնեց հալէպահայութեան։
Այս առիթով, Իրաքի Բարեջան Առաջնորդը Սրբազան Հօր նաեւ յանձնեց Գերմանիոյ Հայոց Թեմին կողմէ հաւաքուած օժանդակութիւնը, որ առաքուած էր Գերմանիոյ Հայոց Առաջնորդ Գերշ. Տ. Սերովփէ Եպս. Իսախանեանի կողմէ։
Այնուհետեւ, Իրաքի Հայոց Թեմի Առաջնորդը Սրբազան Հօր գլխաւորութեամբ այցելեց Սրբ. Քառասնից Մանկանց Մայր եկեղեցի, ուր շրջագայելով ծանօթացաւ եկեղեցւոյ պատմականին եւ սրբապատկերներու պատմական արժէքին։
Սրբազան Հայրը երախտագիտական զգացումներով շնորհակալութիւն յայտնեց Իրաքի Հայոց Թեմի Առաջնորդին եւ Պասրայի եկեղեցւոյ Թաղականութեան ատենապետին՝ իրենց զօրակցական այցելութեան համար եւ համագործակցութեան ոգիով բարեյաջող ու արեւշատ օր։
