Հայաստանէն վե՞ր. Ի՞նչ կայ Հայաստանէն վեր

1042
22/11/2021

Հայաստանէն վե՞ր. Ի՞նչ կայ Հայաստանէն վեր

Այս կիրակի գիտեմ ինչ պիտի հարցնէք._

_ Ազգային բժիշկ, ի՞նչ լուր բերիր հայրենիքէն։

Ի՞նչ լուր պիտի բերեմ... Կարծեմ ամէն ինչ արդէն ինձմէ լաւ գիտէք... Փառք Ֆէյսպուքին այս օրերուն լրատուամիջոցներու պակասը չկայ եւ ամէն մարդ իր ճաշակով եւ իր ուզած համեմունքով լուր կը կարդայ , բայց սպասեցէք, մանղալս վարեմ, գաւաթ մը խմեմ յետոյ ես ալ իմ ճաշակիս թողարկում մը կը կատարեմ...

Ի դէպ այս կիրակի իմ «մանղալ»էս պիտի Հայաստանեան ծուխ բարձրանայ...

Շատ հոտաւէտ, բուրումնաւէտ... Հայաստանեան Լոռի , ճուտի , նրբերշիկի համով հոտը ախորժակնիդ եթէ բանայ, էստի համեցէք։ Իրաւ կ'ըսեմ, եկէք իրար հետ քանի մը գաւաթ հայաստանեան գինի խմենք ու անկեղծանանք...

Հիմա պիտի ըսէք ` ազգային բժիշկ , մենք կարծեցինք հայաստանէն գիրք բերած ես...

Այո , այո , գիրք ալ բերած եմ ու բաւական շատ... Բայց հիմա գիրք կարդալու ժամանակ չէ... Այսօր կիրակի է ու մի մոռնաք որ Հոս Լիբանան է , չալաղաճի մէկ կտորը այստեղ հազար գիրք արժէ, ուստի եկէք միասին խմենք, գինովնանք ու անկեղծանանք...

Գիտեմ որ ալքոհոլը վնասակար է բայց ալքոհոլը նաեւ մարդուն անկեղծ կը դարձնէ։

Առաջին բաժակով պիտի խմենք ի հարկէ մեր նահատակներուն կենացը իսկ երկրորդով հայրենիքը պաշտպանող հայ զինուորին կենացը... Սակայն երրորդ բաժակը խմելէն ետք արդէն պիտի թաղենք իշխանութեան մայրիկը... Իսկ բաժակ մըն ալ աւելի եթէ խմենք, աւելի պիտի անկեղծանանք եւ ընդդիմութիւնն ալ գրողին ծոցը պիտի ուղարկենք...

Յետոյ ոտքի պիտի ելլենք հայրենասիրական երգեր պիտի երգենք ու Հայաստանը ամէն բանէ վեր պիտի դասենք....

Բայց արդեօք իրա՞ւ այդպէս է ... Արդեօք մեզի համար Հայաստանը իսկապէ՞ս ամէն բանէ վեր է ...

Քիչ մը սպասենք... Երբ գինիին ազդեցութիւնը երթայ ու մեր անկեղծութիւնը անհետանայ, այն ատեն իրականութիւնը կամաց կամաց մէջտեղ պիտի գայ....

Եւ այն ատեն պիտի տեսնենք թէ հայաստանէն վեր իրօք ինչ կայ...

Այն ատեն պիտի տեսնենք թէ Հայաստանէն վեր կայ իշխանութիւն,

Հայաստանէն վեր կայ ընդդիմութիւն,

Կայ եկեղեցի, կուսակցութիւն,

Կայ անտարբեր հասարակութիւն....

Եւ այս բոլորին բեռը շալկած, օր ըստ օրէ հիւծող, մաշող ու փոքրացող Հայաստանի հանրապետութիւն...