Էրտողան Սուրիոյ մէջ նոր գործողութիւն մ'ընելու մեծ փափաք ունի. Թուրք գործիչ

Էրտողան Սուրիոյ մէջ նոր գործողութիւն մ'ընելու մեծ փափաք ունի. Թուրք գործիչ

Թէեւ կառավարութիւնը կը պատրաստուի հնարաւոր ռազմական գործողութիւններու, կան նաեւ հիմքեր ենթադրելու, որ գործողութիւնները կրնան մօտալուտ չըլլալ, մասնաւորապէս՝ հաշուի առնելով Թուրքիոյ լարուած յարաբերութիւնները Միացեալ Նահանգներու հետ եւ սուրիական կառավարութեան վերաբերմունքը:

 

Թուրքիոյ կառավարութիւնը, ընտրութիւններէն առաջ հանրային աջակցութեան անկման լոյսին տակ, կը դիտարկէ Սուրիոյ մէջ նոր ռազմական գործողութիւններու կայացումը, յայտնած է Թուրքիոյ արտաքին գործերու նախկին նախարար Եաշար Եաքըշը։

Ռազմական ներխուժումները, որքան ալ սխալ ուղղորդուած ըլլան, նպատակ պիտի ունենան նախքան 2023 թուականին նախատեսուած ընտրութիւնները խթանել կառավարութեան աջակցութիւնը աւելի ազգայնական ընտրողներու շրջանակին մէջ, գրած է Եաքըշը:

«Կառավարութիւնները երբեմն կ'ընդունին որոշումներ, որոնք կրնան նպաստել անոնց քաղաքական գոյատեւման, բայց կը հակասեն իրենց ժողովուրդի ազգային շահերուն», ըսած է արտաքին գործերու նախկին նախարարը:

Թուրքիան 2016-էն ի վեր երեք անդրսահմանային գործողութիւն իրականացուցած է պատերազմէն տուժած Սուրիոյ մէջ: Թուրքիան եւ իր կողմէ աջակցուող սուրիական խմբաւորումները կը վերահսկեն երկու երկիրներու ընդհանուր սահմանին մօտ երեք տարբեր տարածքներ՝ հիւսիսարեւմտեան Աֆրին, Իտլիպ եւ Ռաս ալ Այն:

Թուրքիոյ խորհրդարանը Հոկտեմբեր 26-ին ընդունած է Իրաքի եւ Սուրիոյ մէջ անդրսահմանային գործողութիւններ իրականացնող զինուորականներու մանտաթը եւս երկու տարիով երկարաձգելու միջնորդութիւն։

Թուրքիան այժմ կը դիտարկէ Սուրիոյ մէջ եւս երեք տարածք՝ Մանպիժը եւ Թել Ռիֆաթը Հալէպի նահանգին մէջ եւ աւելի շատ տարածքներ Եփրատէն արեւելք ըսած է Եաքըշը:

Թէեւ կառավարութիւնը կը պատրաստուի հնարաւոր ռազմական գործողութիւններու, կան նաեւ հիմքեր ենթադրելու, որ գործողութիւնները կրնան մօտալուտ չըլլալ, մասնաւորապէս՝ հաշուի առնելով Թուրքիոյ լարուած յարաբերութիւնները Միացեալ Նահանգներու հետ եւ սուրիական կառավարութեան վերաբերմունքը, ըսած է Եաքըշը։

Յաքըշ եղած է Թուրքիոյ արտաքին գործերու նախարարը 2002-2003 թուականներուն։ Ան Էրտողանի իշխող «Արդարութիւն եւ Զարգացում» կուսակցութեան հիմնադիր անդամ է։