24.09c
Երեվան
կրկ, օգս 17
Թուրքիոյ մէջ 8 սեպտեմբերին մեծ պաստառ պիտի բարձրանայ հայ եւ թուրք երիտասարդներու սիրոյ պատմութիւնը ներկայացնող «Կիսատ մնացած» ֆիլմը: «Gerçek gündem» թերթի կայքը կը ներկայացնէ ֆիլմի գլխաւոր հերոսներէ մէկուն՝ Արամին մարմնաւորած թուրք դերասան Ալի Պուհարա Մեթէի մեկնաբանութիւնները ֆիլմի մասին:
Արամը ֆիլմի հերոսուհիի՝ Պոլսոյ համալսարանի մէջ սորվող Իսկուհիի աւագ եղբայրն է, որ ամէն կերպ կը ջանայ խոչընդոտել քրոջ ու անոր թուրք ընկերոջ սէրը: Մեթէի խօսքով՝ իր մարմնաւորած հերոսը շարք մը նախապաշարումներ ունի, ինչի պատճառով շատ խիստ ու թշնամական վարք կը դրսեւորէ. «Որպէս հնագոյն ազգեր՝ մենք շատ ընդհանրութիւններ ունինք: Ես հայերուն ոչ թէ որպէս «օտար» կ'ընկալեմ, այլ որպէս «մենք»: - նշած է Մեթէն՝ աւելցնելով, որ ինքը բազմաթիւ հայ ընկերներ ունի:
Դերասանի խօսքով՝ այս ֆիլմին մէջ նկարահանուելու ժամանակ ան ջանացած է օրինակ վերցնել 2007-ի սպանուած անուանի հայ լրագրող եւ հասարակական գործիչ, «Ակօս»-ի գլխաւոր խմբագիր Հրանդ Տինքէն. «Կերպարը կերտելու ժամանակ շատ աւելի հակադիր բան կը փնտռէի. սկսայ լսել Հրանդ Տինքին, փորձեցի հասկնալ անոր: Իմ խաղցած դերը Տինքին նման չէ: Իմ կերպարը չունի Հրանդ Տինքի դիրքորոշումները: Բայց ոճի եւ խօսքի տեսակէտէ իրեն օրինակ վերցուցած եմ: Հրանդին լսելէ ետք ինծի համար շատ աւելի հեշտ եղաւ խաղալ: Անոր համար այս ֆիլմը կը նուիրեմ Տինքի յիշատակին», - ըսած է Մեթէն:
Յիշեցնենք, որ հայ-թրքական թեմայով Թուրքիոյ մէջ նկարահանուած «Կիսատ մնացած» ֆիլմի գլխաւոր դերերով հանդէս եկած են Իսկուհի Պալճեանը, Անըլ Ալթանը եւ Ալի Պուհարա Մեթէն: Նկարահանուած են նաեւ Նիհան Թարհանը, Մինէ Թիւֆեքչիօղլուն, Մելտա Արատը, Ատնան Էրտողանը եւ Իպրահիմ Կիւնտողանը: Ֆիլմի բեմադրիչն է Էմրէ Եըլմազը:
