1.09c
Երեվան
կրկ, մրտ 01
Նոյեմբերի 20-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը շնորհաւորական ուղերձ յղեց Մոսկուայի եւ Համայն Ռուսիոյ Քիրիլ Պատրիարքին ծննդեան 75-ամեակի առիթով:
Ռուս Ուղղափառ Եկեղեցու գահակալին ուղղուած շնորհաւորագրում ասուած է. «Ձերդ Սրբութիւն, Ձեր ողջ կեանքը, Ձեր հովուապետական ծառայութիւնը ամբողջապէս նուիրել էք աշխարհում Քրիստոսի Եկեղեցու դերի ամրապնդմանը, Սուրբ Աւետարանի անանց ճշմարտութիւնների բարեյաջող վկայութեանը եւ մարդկանց սրտերում հոգեւոր ու բարոյական արժէքների անդադարարմատաւորմանը՝ արդի մարտահրաւէրների յաղթահարման եւ մարդկութեան խաղաղ ու բարօր կեանքի կերտման գործում հոգեւորի առաքելութեան եւ կարեւորութեան ամուր գիտակցութեամբ: Ձեր հովուական խօսքն ու խրատը մեր օրերում իբրեւ փարոս է ծառայում կարօտեալների, տկարների եւ մխիթարութիւն ու հոգեւոր լուսաւորութիւն փնտրող շատերի համար:
Այս նշանակալից օրը գոհունակութեամբ ցանկանում ենք յատկապէս ընդգծել Ձեր անձնական ներդրումը մեր Եկեղեցիների միջեւ սերտ կապերի եւ գործակցութեան զարգացման հարցում, ինչն իր հերթին կարեւոր ուղերձ է հաւատակից մեր ժողովուրդների եղբայրական յարաբերութիւնների համար ողջ աշխարհում: Բարձրօրէն գնահատում ենք Ձեր ջերմ վերաբերմունքը Հայոց Եկեղեցու եւ հայ ժողովրդի նկատմամբ, որի դրսեւորումն են նաեւ Ձեր հոգատարութիւնն եւ անխոնջ ջանքերը ղարաբաղեան հակամարտութեան խաղաղ կարգաւորման, հայոց հոգեւոր ժառանգութեան պահպանման եւ Դադիվանքի անխաթար գործունէութեան ապահովման համար»։
Նորին Սրբութիւնը Քիրիլ Պատրիարքին մաղթել է արեւշատ կեանքի երկար տարիներ եւ Աստծոյ զօրակցութիւնը հովուապետական ծառայութեան մէջ՝ յանուն Ռուսաստանի եւ Ռուս Եկեղեցու պայծառութեան:
