16.09c
Երեվան
կրկ, հկտ 11
Թունիսի խորհրդարանի երէկուան նիստի ընթացքին քննարկուած «Թէժ կէտերէն վերադարձող ահաբեկիչներ»ու հարցը պատգամաւորները բաժնած է երկու խումբի: Անոնց մէկ մասը համարած է, որ անոնք պէտք չէ երկիր վերադառնան, մինչ միւս մասը յայտնած է, որ «սահմանադրութիւնը չ'արգիլեր թունիսցիներու երկիր վերադարձը»:
Նիստի ընթացքին, Թունիսի նախագահի հիմնադրած «Թունիսի կանչը» կուսակցութեան անդամները պաստառներ վերցուցած են՝ «Ո'չ ահաբեկիչներու վերադարձին» մակագրութեամբ, իսկ ժողովրդական ճակատի ներկայացուցիչ պատգամաւոր Մանճի Ալ Ռահուի պահանջած է ընդառաջել «Ո'չ ահաբեկիչներու վերադարձին» կոչին՝ արգիլելու համար Թունիսը քանդելու նպատակով ժամանած ահաբեկիչներու վերադարձը, այնպէս, ինչպէս քանդեցին Սուրիան, Լիպիան ու Իրաքը»:
Միւս կողմէ «Ալ Նահտա» խմբաւորման ներկայցուցիչ պատգամաւոր Ռամզի Պին Ֆարաճ յայտնած է, որ «Ահաբեկիչները թունիսցի են, եւ ոչ մէկ օրէնք կը սահմանափակէ անոնց վերադարձը երկիր»:
Յիշենք, որ անցեալ Շաբաթ օր հարիւրաւոր թունիսցիներ համախմբուելով Թունիսի խորհրդարանին դիմաց պահանջած էին արգիլել ահաբեկիչներու վերադարձը:
Ըստ Թունիսի Ներքին Գործոց նախարար Ալ Հատի Ալ Մաճտուպի, թէժ կէտերէն երկիր վերադարձող ահաբեկիչներու թիւը գերազանցած է 800-ը:
Թունիսի սահմանադրութեան 25-րդ յօդուածին համաձայն, «Օրէնքը կ'արգիլէ ոեւէ քաղաքացիի քաղաքացութենէ զրկելը, օտարացնելը, այլ երկիրներու յանձնելն ու դէպի երկիր վերադարձը խանգարելը»:
