20.09c
Երեվան
կրկ, ապր 26
Շաբաթէ մը ի վեր անյետացած Թէքէեաններու հարցով «Արեւելք» այսօր կապ հաստատեց Պոլսոյ Պատրիարքութեան տեղապահ Տ. Արամ Արք. Աթէշեանին հետ: Սրբազանը մեր հետ ունեցած հեռախօսազրոյցին ընթացքին յայտնեց, որ ինք կապ հաստատած է Իզմիր ժամանած Թէքէեաններու հարազատ՝ Տիկին Նայիրիին հետ եւ անոր փոխանցած իր պատրաստակամութիւնը պէտք եղած օգնութիւնը ցուցաբերելու համար: «Խորտակուած լաստանաւը մօտիկ ըլլալով յունական եզերքին, դիմեցինք Յունաստանի մեր ծանօթներուն, որպէսզի որեւէ տեղեկութեան պարագային մեզի լուր մը փոխանցեն»,- ըսաւ Սրբազան հայրը, յաւելելով, որ պետական մարմիններ իրենց սկսած որոնողական աշխատանքները կը շարունակեն գտնելու համար Թէքէեաններուն հետքերը: Ըստ Արամ Սրբազանի փոխանցումին մինչեւ երէկ Յունաստանի ափերուն մօտ խորտակուած լաստանաւէն յայտնաբերուած են 3 դիակներ: Ան նաեւ նշեց, որ խորտակուած նաւուն վրայ եղած են 14 անձեր, որոնցմէ փրկուած են 7 հոգի, որոնց մէջ նաեւ լողալով Իզմիր հասած Արինա Թէքէեանը: Արամ Սրբազան նաեւ նշեց, որ ինք պատրաստ է բոլոր միջոցներով օգնել Արինա Թէքէեանին, եթէ Թուրքիայէն դուրս գալու համար անհրաժեշտ որեւէ փաստաթուղթի կարիք զգացուի: Նշենք, որ մեր ունեցած տեղեկութիւններուն համաձայն Արինայի պարագաները յարմար կը նկատեն, որ երիտասարդուհին իր մօրաքրոջ հետ Գերմանիա մեկնի, եւ այս առումով գրաւոր դիմում մը ներկայացուցած են Իզմիր գտնուող Գերմանիոյ հիւպատոսութեան:
