20.09c
Երեվան
ուրբ, մյս 15
Լիբանան- Սուրիա սահմանային հատուածին վրայ եղող Արսէլ աւանի լեռնային հատուածներուն վրայ մարտերը կը շարունակուին: Այս մասին լուր փոխանցող աղբիւրներ այ առաւօտ յայտնեցին, որ «Հըզպալլա», որ յարձակումը կը գործէ լիբանանեան հատուածէն, կարեւոր յառաջխաղացք գրանցած է եւ ծանր վնասներ պատճառած ահաբեկիչ զինեալներուն: Իր կարգին «Լիբանան 24» կայքին փոխանցմամբ «Հըզպալլա»ի 3 զինեալներ զոհուած են երէկ, մինչ զինեալներու զոհերուն թիւը կը գնահատուի տասնեակներով:
Յիշեցնենք, որ շաբաթ մը առաջ «Հըզպալլա»ի առաջնորդ Սէյիտ Հասան Նասրալլա իր պատկերասփռուած ելոյթին ընթացքին յայտարարած էր, որ Արսէլի լեռներուն վրայ գտնուող զինեալներուն «ժամը հասած» է, եւ անոնք պէտք է վճռեն իրենց ընելիքը:
Յատկապէս «Ալ Նուսրա» ճակատին դէմ ընթացող այս մարտերը տեղի կ'ունենան այն պահուն, երբ նոյնպէս Սուրիոյ տարբեր քաղաքներուն մէջ Քաթարի նախկին նեցուկը վայելող «Ալ Նուսրա»ն մահ ու կենաց մարտեր կը մղէ:
Իր կարգին Լիբանանի կառավարութիւնը, որուն համար հիմնական օրակարգը Արսէլի անվտանգութեան եւ փախստականներուն անվտանգութեան ապահովումն է, յայտարարած է, որ բանակը ամէն գնով պատրաստ է իր պարտականութիւնները կատարել:
