5.09c
Երեվան
հնգ, նմբ 14
Երկուշաբթի, 29 Յունուար 2018-ի առաւօտուն, Արամ Ա. վեհափառ հայրապետը, ընկերակցութեամբ Լիբանանի հայոց թեմի առաջնորդ Շահէ եպս. Փանոսեանի եւ միաբան հայրերու, այցելեց Հայ կաթողիկէ եկեղեցւոյ հոգեւոր պետ Գրիգոր Պետրոս Ի. կաթողիկոս-պատրիարքին եւ Մերձաւոր Արեւելքի Հայ աւետարանական եկեղեցիներու միութեան նախագահ վեր. Մկրտիչ Գարակէօզեանին:
Երկու կրօնական կեդրոններուն մէջ եղբայրական սիրալիր մթնոլորտի մէջ տեղի ունեցած խօսակցութիւնները, հոգեւոր հայրերու ներկայութեան, կեդրոնացան ընդհանրապէս հայ ժողովուրդը յուզող, ինչպէս նաեւ Հայաստան-սփիւռք եւ միջհամայնքային գործակցութեան առնչուած հարցերու վրայ:
Վեհափառ հայրապետը ընդգծեց մեր ազգին ներքին միասնականութիւնը ամրապնդելու հրամայականը` յիշեցնելով, որ մեր ժողովուրդի բոլոր զաւակները քրիստոնէական, ազգային ու մշակութային նոյն արմատները, աւանդութիւնները, մտահոգութիւնները եւ մարտահրաւէրները ունին. հետեւաբար անհրաժեշտ է համախմբուիլ մեր ազգը եւ հայրենիքը միացնող արժէքներուն ու ձգտումներուն շուրջ:
