25.09c
Երեվան
երք, հլս 08
Տասնամեակներ շարունակ մարդիկ ամբողջ աշխարհին մէջ աւելի հարուստ եւ աւելի առողջ կը դառնային, սակայն 2020 թուականի վարակիչ հիւանդութեան համաշխարհային բռնկումը մեծապէս ազդած է ինչպէս մարդոց դրամապանակի, այնպէս ալ հաւաքական առողջութեան վրայ:
«Այս տարին տարբեր է, եզակի: «Քովիտ-19»-ի համավարակը ոչ միայն կանգնեցուցած է առաջընթացը, այլեւ այն ետ մղած է»,- ըսած է գործարարը «Պիլ եւ Մելինտա Կէյց հիմնադրամի» 2020-ի զեկոյցի շրջածիրէն ներս, որ 2017 թուականէն ի վեր կը ներկայացնէ ամբողջ աշխարհի մէջ ամենամեայ զարգացման ընթացքը աղքատութեան, առողջութեան եւ բարեկեցութեան ոլորտներուն մէջ:
Նշուած է, որ վերջին անգամ այսքան մեծ թիւով երկիրներ անկում ապրած են 1870 թուականին: Համաշխարհային դրամատան գնահատմամբ՝ 1998 թուականէն ի վեր առաջին անգամ աղքատութեան մակարդակը կտրուկ պիտի բարձրանայ ամբողջ աշխարհի մէջ, քանի որ համաշխարհային տնտեսութիւնը անկման եւ յետընթացի շրջափուլ թեւակոխած է:
Աղքատութեան համաշխարհային մակարդակը պիտի աճի վերջին 20 տարուան մէջ առաջին անգամ: «Եւս 37 միլիոն մարդ ծայրայեղ աղքատութեան մէջ պիտի գտնուի»,- նշած է Պիլ Կէյցը:
Բացի այդ, անոր խօսքով՝ 25 տարուան առաջխաղացումը պատուաստանիւթերու հարցով ջնջուած է 25 շաբթուան ընթացքին: Համավարակի պատճառով շատ աւելի մեծ թիւով երեխաներ չեն ստացած իրենց համար անհրաժեշտ պատուաստումները:
