Համահայկական 7-րդ խաղերու նախապատրաստական աշխատանքները մեծ թափով կ'ընթանան Հայաստանի, Արցախի եւ սփիւռքի մէջ:
Համահայկական խաղերու համաշխարհային կոմիտէի ընդլայնուած պատուիրակութիւնը իրականացուց խաղերու ջահի վառման արարողութիւնը եւ այն սկսաւ Արցախի մայրաքաղաք Ստեփանակերտէն:
Պատմութեան մէջ առաջին անգամ իրականացուած՝ Երեւան-Վան թռիչքով հայկական պատուիրակութիւնը ժամանեց Վան: Իշխան Զաքարեանի գլխաւորած պատուիրակութեան օդակայանին մէջ դիմաւորեցին Վանի քաղաքային իշխանութիւնները:
Վանի քաղաքապետ Պետիա Էրթանը նշեց, որ մարզական, զբօսաշրջային եւ մշակութային կապերու զարգացման կրնան նպաստել համահայկական խաղերը, որոնք կը համախմբեն աշխարհի բոլոր ծայրերուն, այդ շարքին՝ Թուրքիոյ տարածքին ապրող հայերը:
Ի պատասխան՝ Իշխան Զաքարեանը տեղեկացուց, որ կոմիտէն մտայղացում ունի՝ յաջորդ համահայկական խաղերը կազմակերպել Վանի եւ Երեւանի մէջ:
Յաջորդ օրը Բագրատունիներու հինաւուրց մայրաքաղաք Անին համահայկական խաղերու ջահը փոխանցեց մեր հպարտութեան եւ յաղթանակներու մայրաքաղաք Ստեփանակերտին:
Կարսի քաղաքապետ Այհան Պիլկէնի հետ հանդիպման ժամանակ Իշխան Զաքարեանը քննարկման դրաւ համահայկական խաղերու ծրագրով Գիւմրի-Կարս քաղաքներուն մէջ միջոցառումներ իրականացնելու գաղափարը:
Իգդիրի քաղաքապետ Եաշար Աքքուշը, ընդունելով հայկական պատուիրակութիւնը, ցանկութիւն յայտնեց, որ սահմանը բացուի ու նման մարզական խաղերու միջոցով տարբեր բնագաւառներու մէջ բարիդրացիական յարաբերութիւններ հաստատուին:
Սփիւռքի ջահը վառեցաւ Կիլիկիոյ թագաւորութեան հերոսական վայրերէն մէկուն՝ Մուսա Լերան ստորոտին:
Համահայկական խաղերու համաշխարհային կոմիտէի նախագահ Իշխան Զաքարեանի, փոխնախագահներ Ստեփան Տէր-Պետրոսեանի եւ Ռոլանտ Շառոյեանի, գործկոմի անդամ Պերճ Հալաճեանի եւ այլոց մասնակցութեամբ ջահի վառման պատիւը տրուեցաւ ամերիկահայ բարերար, համահայկական խաղերու հիմնադիրներէն՝ Ալպեր Պոյաճեանին:
Հայաստանի եւ Արցախի պետական դրօշներու ներքոյ՝ Պոլսոյ Սուրբ Վարդանանց եկեղեցւոյ հոգեւոր առաջնորդ, Հայր Սուրբ Թաթուլ Անուշեանի աղօթքով բոցավառուեցաւ ամառային 7-րդ խաղերու ջահը:
Համահայկական լերան ուժը հերոսական Արցախին փոխանցելու համար կոմիտէի փոխնախագահ Ստեփան Տէր Պետրոսեանի գլխաւորութեամբ ջահը հասաւ Մուսա-լերան հերոսամարտի վայրը՝ լերան գագաթը:
Մուշ-Անի ճանապարհին պատուիրակութեան անդամները համահայկական խաղերու ջահը խոնարհեցին հայ ազգային –ազատագրական շարժման հերոս Գէորգ Չաւուշի գերեզմանին:
Մուշի մէջ պատուիրակութիւնը ընդունեց քաղաքապետ Ֆեյաթ Ասիան, քննարկուեցան շարք մը հետաքրքիր գաղափարներ:
Վանի, Մուշի, Իգդիրի եւ Կարսի քաղաքապետները սիրով ընդունեցին Համահայկական խաղերու համաշխարհային կոմիտէի նախագահ Իշխան Զաքարեանի հրաւէրը՝ մասնակցելու ամառային 7-րդ խաղերուն:
