Ըստ Վարդան Օսկանեանի խաղաղութեան պայմանագրի ստորագրումը մօտ է

Ըստ Վարդան Օսկանեանի խաղաղութեան պայմանագրի ստորագրումը մօտ է

Սեղանի վրայ այսօր կայ այսպէս կոչուած խաղաղութեան պայմանագիր, իմ տեղեկութիւններով բաւական առաջ գացած է եւ  մօտ է ստորագրման: Այս մասին իր դիմատետրեան տեսաուղերձին մէջ ըսած է ՀՀ Արտաքին գործոց նախկին նախարար Վարդան Օսկանեանը:

«Այդ փաստաթղթում նախկինում կար մի կէտ, եթէ չեմ սխալւում 9-րդ կէտը, որտեղ խօսւում էր Արցախի ժողովրդի իրաւունքների, անկախութեան հարցերի մասին, այդ կէտն այսօր հանուած է այդ պայմանագրից, գոյութիւն չունի, ընդհանրապէս Արցախի մասին խօսք չկայ եւ եթէ այս բովանդակութեամբ է ստորագրւում այդ պայմանագիրը, դրանով մենք փակում ենք Արցախի էջը: Պատահական չէ, որ Ադրբեջանի նախագահը վերջերս ասաց, որ հայերը պէտք է մոռանան Արցախի մասին: Ես կարծում եմ, որ դա անհնար պահանջ է, հայ ժողովուրդը երբեք չի կարող մեռանալ Արցախի մասին: Արցախի մոռացում նշանակում է մոռանալ մեր անցեալը, մեր պատմութիւնը մեր ողջ մշակութային ժառանգութիւնը: Արցախը մենք չենք կարող մոռանալ, որովհետեւ Արցախը հայկական հող է: Արցախը երբեք անկախ ադրբեջանի կազմում չի եղել, նոյնիսկ սովետական շրջանում Արցախն ունեցել է ինքնավար կարգավիճակ, իսկ վերջին 30 տարիներին Արցախը եղել է փաստացի քաղաքական միաւոր: Պահանջել,որ հայ  ժողովուրդը մոռանայ Արցախը, դա ուղղակի անհնար է»,- ըսած է ան:

Օսկանեանը նշած է, որ խնդիրը կը կայանայ անոր մէջ, որ ՀՀ իշխանութիւնները կը տրուին ատոր եւ այս փաստաթուղթի ստորագրումը այս բովանդակութեամբ մոռացութեան կը տանի Արցախը:

«Ադրբեջանը պէտք է հասկանայ, որ այս պայմանագիրը նրանք ստորագրում են ոչ թէ Հայաստանի հետ, հայ ժողովրդի հետ, այլ Նիկոլ Փաշինեանի եւ նրա կառավարութեան հետ, հայ ժողովուրդը չի կարող մոռանայ Արցախը»,-ըսած է Օսկանեանը եւ շեշտած, որ Արցախի ժողովուրդի վերադարձն իրենց տուներ պէտք է մաս կազմէ այս պայմանագրին, եթէ իրօք այն խաղաղութեան պայմանագիր է:

Արտաքին գործոց նախկին նախարարի խօսքով՝ այսօր իշխանութիւնները ունին այդ վերջին հնարաւորութիւնը՛ որ Արցախի հարցը ներառեն այս պայմանագրի մէջ:

«Դա հայ ժողովրդի, Արցախի ժողովրդի նվազագոյն իրաւունքն է եւ դրա տէրն ու տիրականը պէտք է լինի ՀՀ կառավարութիւնը: ՀՀ կառավարութիւնը պարտաւոր է այսօր այդ հարցին տէր կանգնել եւ միակ պայմանը այս կէտի ներառումն է, 9-րդ կէտը պէտք է վերադարձնել պայմանագրի մէջ, որ Արցախի ժողովուրդը միջազգային երաշխիքներով պէտք է վերադառնայ: Այ դա իսկապէս կարող է ինչ-որ առումով խաղաղութիւն բերել մեր երկու ժողովուրդներին»,-ըսած է ան:

Օսկանեանը ինչպէս նախապէս, այս անգամ եւս առաջարկեց աշխատիլ իշխանութիւններու հետ այդ հարցն օրակարգ բերելու համար՝ նշելով, որ պարզապէս կամք եւ ցանկութիւն պէտք է, այլ ոչ թէ իշխանութիւնը պահելու նեղ հաշուարկներ: