Վրաստանի մէջ պատերազմ պիտի չըլլայ, այլ՝ ընտրութիւններ

Վրաստանի մէջ  պատերազմ պիտի չըլլայ, այլ՝ ընտրութիւններ

Զիս այլեւս չեն հետաքրքրեր ընդդիմութեան հարցերը կամ ընտրութիւններուն վերաբերեալ անհեթեթ յայտարարութիւնները: Բոլոր ընտրութիւնները աւարտած են, մենք յաղթած ենք:

 

Վրաստանի վարչապետ Իրաքլի Ղարիպաշվիլին ըսած է, որ երկրին մէջ երկրորդ ճակատ պիտի չըլլայ, պիտի չըլլան նաեւ արտահերթ ընտրութիւններ, եւ նախկին նախագահ Սահակաշվիլիի` բուժման համար արտասահման տեղափոխում եւս պիտի չըլլայ:

«Մենք անհրաժեշտ բարձրութեան վրայ ենք: Մենք երկարաժամկէտ խաղաղութիւն կ'երաշխաւորենք բնակչութեան համար: Երկրին մէջ որեւէ երկրորդ ճակատ, որեւէ պատերազմ պիտի չըլլայ: Հակառակը, պիտի ըլլլայ զարգացում, շինարարութիւն եւ խաղաղութիւն», ըսած է Ղարիպաշվիլին:

Ընդ որում, ան նշած է, որ երկրին մէջ առկայ երկարաժամկէտ խաղաղութիւնն ու կայունութիւնը «Վրացական երազանք»-ի հիմնադիր Պիձինա Իվանիշվիլիի վաստակն է, եւ իշխող կուսակցութիւնը կը շարունակէ այդ քաղաքականութիւնը:

«Բոլորին համար կարեւոր է, որ երկրին մէջ խաղաղութիւն եւ կայունութիւն ըլլայ: Այդ ամենահիմնարար բանն է: Առանց անոր երկրին մէջ ոչինչ կ'ըլլայ…. Մեր երկիրը, մեր ժողովուրդը արդէն երեք անգամ կռուած է Ռուսաստանի դէմ: 90-ականներէն սկսեալ, յետոյ` քաղաքացիական պատերազմ, մենք հազարաւոր դժուարութիւններ ապրած ենք: Յետոյ աւերիչ հետեւանքներ բերած օգոստոսեան պատերազմն ու մեր տարածքներու բռնագրաւումը, որ կը շարունակուի մինչ օրս: Եթէ սա լաւ չվերլուծենք ու շարունակենք անպատասխանատու հռետորաբանութիւնն ու անպատասխանատու գործունէութիւնը, այդ շարքին` խօսքը ներքին թշնամիներու աւերիչ գործունէութեան մասին է, շատ վատ պիտի ըլլայ: Սակայն, ի հարկէ, մեր կառավարութիւնը այդ թոյլ պիտի չտայ», ըսած է վարչապետը:

Ան նաեւ չէ բացառած Վրաստանի մէջ արտահերթ խորհրդարանական ընտրութիւններու հնարաւորութիւնը:

«Զիս այլեւս չեն հետաքրքրեր ընդդիմութեան հարցերը կամ ընտրութիւններուն վերաբերեալ անհեթեթ յայտարարութիւնները: Բոլոր ընտրութիւնները աւարտած են, մենք յաղթած ենք: Յաջորդ ընտրութիւնները տեղի պիտի ունենան 2024 թուականին», ընդգծած է Ղարիպաշէիլին:

Մեկնաբանելով ընդդիմութեան վերջին յայտարարութիւնները, ան Սահակաշվիլիին արտասահման բուժման համար տեղափոխելու պահանջները ոչ-համարժէք անուանած է:

«Այս երկրին մէջ բոլորը պէտք է ենթարկուին օրէնքին: Անոնք, որոնք համարձակեցան եւ իրենց օրէնքէն վեր դասեցին, ստացան այն, ինչին արժանի էին: Մնացածը զիս չի հետաքրքրեր: Ան բանտարկեալ է, եւ թող բարեհաճի մինչեւ վերջ կրել իր պատիժը: Անոր տեղափոխման համար հիմքեր չկան», ըսած է կառավարութեան ղեկավարը: