12.09c
Երեվան
երք, մրտ 11
Թքական «Պայրաքթար» մարտական անօդաչու թռչող սարքերու (ԱԹՍ) վաճառքը Ուքրանիա ցաւագին կ'ընկալուին ռուսական հասարակութեան մէջ: Այդ մասին յայտարարած է Թուրքիոյ մէջ Ռուսաստանի դեսպան Ալեքսէյ Երխովը:
«Չեմ կրնար չանդրադառնալ մէկ հարցումի, որ ինծի այստեղ յաճախ կու տան` ինչպէ՞ս կը վերաբերինք Ուքրանիոյ թրքական «Պայրաքթար»-ներու մատակարարման: Ես լիովին ազնիւ պիտի ըլլամ: Դուք չէք ալ կրնար պատկերացնել, թէ որքան ցաւագին կ'ընկալուին այդ առաքումները ռուսական հասարակութեան մէջ: «Պիզնեսը պիզնես է» բացատրութիւնները չեն հասկցուիր, քանի որ ձեր անօդաչու թռչող սարքերը կը սպաննեն մեր զինուորները, անոր համար անոնք կը գնուին: Ի դէպ, նշեմ` երկիր մը, որ կը յաւակնի Թուրքիոյ դաշնակիցը համարուելու, սովորութիւն ունի մեծ քանակութեամբ զէնք փոխանցելու անոնց, որու հետ կը կռուին «մեհմետները», իսկ այդ Անգարային այնքան ալ հաճելի չէ: Այդ պարագային ինչո՞ւ մեզի պէտք է հաճելի ըլլայ», շեշտած է դիւանագէտը: Դեսպանը ընդգծած է, որ Ռուսաստանը զէնք չի տար անոնց, որոնց դէմ կը կռուի թրքական բանակը եւ Թուրքիան այդ լաւ գիտէ:
Թուրքիան վերջին տարիներուն հիմնած է մարտական անօդաչու թռչող սարքերու արտադրութիւն ոչ միայն իր զինուած ուժերուն կարիքները հոգալու, այլ նաեւ արտահանման համար: Այս պահին արդէն վեց պետութիւն ունի «Պայրաքթար» անօդաչու թռչող սարքեր` Ատրպէյճանը, Քաթարը, Լիպիան, Մարոքը, Լեհաստանը եւ Ուքրանիան: Այս տեսակի անօդաչու թռչող սարքերը օգտագործուած են Լեռնային Ղարաբաղի, Սուրիոյ եւ Լիպիոյ մէջ մարտական գործողութիւններու ընթացքին:
