Նազարպայեւի փեսան դուրս «նետուեցաւ» խաղէն

Նազարպայեւի փեսան դուրս «նետուեցաւ» խաղէն

Ղազախստանի նախկին նախագահ Նուրսուլթան Նազարպայեւի միջնեկ դստեր՝ Տինարայի ամուսինը՝ Թիմուր Քուլիպաեւը, յայտարարած է «Աթամեքեն» ձեռնարկատէրերու ազգային պալատի նախագահութեան նախագահի լիազօրութիւնները վայր դնելու մասին:

Այդ մասին կ'ըսուի անոր յայտարարութեան մէջ:

«Այսօրուընէ ես որոշած եմ վայր դնել «Աթամեքեն» ձեռնարկատէրերու ազգային պալատի նախագահութեան ընտրուած նախագահի իմ լիազօրութիւնները», ըսած է ան: Յայտարարութեան մէջ Քուլիպայեւը շնորհակալութիւն յայտնած է գործընկերներուն համատեղ աշխատանքի համար եւ ամփոփած է աշխատանքի արդիւնքները:

 Իր հրաժարականին պատճառը ան չէ պարզաբանած: Քուլիպայեւը եւ անոր կինը երկրի մեծագոյն դրամատան՝ Ղազախստանի ժողովրդական դրամատան սեփականատէրերն են: Յունուար 15-ին «Սամռուք-Քազինա» ազգային բարեգործական հիմնադրամը հաղորդած էր «Ղազթրանսսոյլ» ընկերութեան ղեկավար Տիմաշ Տոսանովի եւ «ՂազախԿազ» ազգային բաժնետիրական ընկերութեան (նախկին անուանումը՝ «ՂազԹրանսԿազ») ղեկավար Քայրաթ Շարիբպայեւի լիազօրութիւններու վաղաժամկէտ դադրեցման մասին:

Առաջինը Նազարպայեւի կրտսեր դստեր՝ Ալիայի ամուսինն է, իսկ երկրորդը Ղազախստանի լրատուամիջոցները կը համարեն աւագ դստեր՝ Տարիկա Նազարպայեւայի ամուսինը:

Ալիա Նազարպայեւան Յունուար 13-ին Ֆէյսպուքի եւ Ինսթակրամի մէջ հաղորդագրութիւն զետեղած էր, որուն մէջ յայտարարած է, որ ծանր կը տանի երկրին մէջ կատարուող իրադարձութիւնները եւ շնորհակալութիւն յայտնած է ղազախստանցիներուն՝ իր հօր նկատմամբ ցուցաբերուած աջակցութեան համար: Ինչպէս ուշադրութիւն դարձուցած են, Ինսթակրամը պարզած է, որ օգտահաշուի տէրը կը գտնուի ԱՄԷ-ի մէջ:

Անկէ յետոյ օգտահաշիւները դադրած են հասանելի ըլլալէ: Տարիկա Նազարպայեւան ներկայ չէ գտնուած խորհրդարանի Յունուար 12-ի նիստին: Պալատի մամուլի ծառայութիւնը ճշդած է, որ Նազարպայեւան հիւանդ է: