-0.91c
Երեվան
երք, դկտ 23
Հռչակագիրը, որ ստորագրած են Ռուսաստանի առաջնորդն ու Ատրպէյճանի նախագահը, չի ստեղծեր խնդիրներ Հայաստանի հետ ռուսական դաշնակցային յարաբերութիւններուն համար, յայտնած է Ռուսաստանի Արտաքին գործոց նախարարութեան պաշտօնական ներկայացուցիչ Մարիայ Զախարովան:
Անոր խօսքով` Մոսկուան կը պահպանէ բոլոր պարտաւորութիւնները Երեւանի նկատմամբ, որ Ռուսաստանի վաղեմի եւ մտերիմ դաշնակիցն է:
«Մենք համոզուած ենք, որ Պաքուի հետ վերոնշեալ հռչակագրի ստորագրումը թոյլ պիտի տայ ամրապնդելու Հայաստանի, Ատրպէյճանի ու Ռուսաստանի միջեւ եռակողմ փոխգործակցութիւնը», ըսած է Զախարովան:
ՌԴ ԱԳՆ պաշտօնական ներկայացուցիչը յաւելած է, որ, հաշուի առնելով տարածաշրջանին մէջ փոփոխուած աշխարհաքաղաքական իրողութիւնները, Ռուսաստանը անդադար կը թարմացնէ երկկողմանի պայմանագրաիրաւական խարիսխը Հայաստանի հետ, որ ներկայիս բաղկացած է շուրջ 200 փաստաթուղթէ:
Զախարովայի հաւաստմամբ` Ռուսաստանի առաջնորդին եւ Ատրպէյանի նախագահին միջեւ ստորագրուած փաստաթուղթը ուղղուած է տարածաշրջանային անվտանգութեան ամրապնդման:
«Ինչ կը վերաբերի ղարաբաղեան կարգաւորման ու հայ-ատրպէյճանական յարաբերութիւններու բնականոնացման, ապա հռչակագրին մէջ Ատրպէյճանի հետ դաշնակցային փոխյարաբերութիւններու մասին կայ դրոյթ, որ կողմերը կրնան միասնաբար նպաստել 2020-ի Նոյեմբեր 9-ին Հայաստանի, Ռուսաստանի եւ Ատրպէյճանի առաջնորդներուն միջեւ, ինչպէս նաեւ 2021-ի Յունուար 11-ին ու Նոյեմբեր 29-ին ստորագրուած յայտարարութիւններու դրոյթներու իրագործման», նշած է Զախարովան:
Անոր խօսքով` 10-րդ դրոյթին մրջ նշուած է, որ կողմերը կը համագործակցին աւելի վաղ ձեռքբերուած պայմանաւորուածութիւններէն բխող խնդիրներու լուծման գործին մէջ, եւ սերտ կը համագործակցեն տարածաշրջանի պետութիւններուն միջեւ երկարաժամկէտ խաղաղութիւն հաստատելու ուղղութեամբ:
