33.09c
Երեվան
կրկ, հլս 07
Բրիտանացիներն այսօր ընտրատեղամասեր կ՚ուղուին՝ որոշելու նոր կառավարութեան կազմը, որ երկիրը պիտի ղեկավարէ յառաջիկայ հինգ տարին՝ գրած են արեւմտեան լրատուամիջոցները:
Սա Մեծ Բրիտանիոյ մէջ առաջին համընդհանուր ընտրութիւնն է Եւրոմիութենէն երկրի դուրս գալէն ետք: Ընտրատեղամասեր բացուած են Անգլիոյ, Շոթլանտայի, Ուելսի եւ Հիւսիսային Իրլանտայի 650 ընտրատարածքի մէջ, ամբողջ երկրի մէջ ընտրելու իրաւունք ունի մօտ 50 միլիոն մարդ:
Մեծ Բրիտանիոյ խորհրդարանի Համայնքներու պալատին մէջ 650 տեղի համար կը պայքարի 4515 թեկնածու:
Հարցումները ցոյց տուած են, որ ընդդիմադիր Աշխատաւորական կուսակցութիւնը՝ Քիր Սթարմըրի գլխաւորութեամբ, կրնայ ջախջախիչ յաղթանակ տանիլ իշխող պահպանողականներու նկատմամբ՝ 14 տարուան ընդմիջումէ ետք նորէն գալով իշխանութեան:
Ըստ օրէնքի՝ կառավարութիւն կը կազմէ այն կուսակցութիւնը, որ կը ստանայ խորհրդարանի մանթատներու մեծամասնութիւնը՝ առնուազն 326:
Քուէարկութեան առաջին արդիւնքները պիտի հրապարակուին տեղամասերը փակուելէն անմիջապէս ետք։ Սակայն նոր խորհրդարանի կազմաւորման հետ կապուած ընդհանուր պատկերը պարզ պիտի դառնայ յուլիս 5-ի առաւօտեան։ Կը սպասուի, որ այդ օրը յաղթած կուսակցութեան առաջնորդը երթայ Պուքինկհեմեան պալատ եւ թագաւոր Չարլզ III-ին տեղեկացնէ կառավարութիւն ձեւաւորելու պատրաստակամութեան մասին։
