14.09c
Երեվան
չրք, հկտ 16
Իսրայէլի հարուածն Իրանին պիտի ըլլայ «մահացու, ճշգրիտ եւ շատ անսպասելի», յայտարարած է պաշտպանութեան նախարար Եոաւ Կալանթը:
Ելոյթ ունենալով Իսրայէլի պաշտպանութեան բանակի 9900 հետախուզական ստորաբաժանուման մէջ՝ Կալանթը նշած է, որ Իրանը «պիտի չհասկնայ՝ ինչ պատահեցաւ իր հետ եւ ինչպէս»: Այս մասին գրած է Times of Israel-ը:
Կալաթն ընդգծած է, որ հոկտեմբեր մէկի գիշերն Իրանի կողմէ Իսրայէլի ուղղութեամբ 181 պալիսթիք հրթիռներու արձակումը «զօրաւոր էր, բայց ձախողած էր, քանի որ ատոնք ճշգրիտ չեն խոցած թիրախները»:
Կալանթը շեշտած է, որ յարձակման ժամանակ Իսրայէլի պաշտպանութեան բանակը չէ տուժած: Անոր պնդմամբ՝ իսրայէլեան օդուժի ռազմակայաններու բոլոր թռիչքուղիները կը գործեն, ոչ մէկ օդանաւ վնասուած է, ոչ ալ տուժած են զինուորներ կամ քաղաքացիական անձինք:
Կալանթի խօսքով՝ իսրայէլեան անվտանգութեան ողջ համակարգը՝ ցամաքի վրայ գտնուող զինուորէն մինչեւ վարչապետ, համաժամանակեցուած է Իրանի դէմ հարուածի շուրջ:
Միեւնոյն ժամանակ Իրանը հրապարակած էր արբանեակային լուսանկարներ՝ ապացուցելով, որ իր հարուածէն իսրայէլեան օդուժի ռազմակայանները վնասներ կրած են:
