image

Լոս Անճելըսի մէջ Փիէռ Սիմոնեանի (Salon Piere) կորուստը

 Լոս Անճելըսի մէջ Փիէռ Սիմոնեանի (Salon Piere) կորուստը

Միացեալ Նահանգներու Լոս Անճելըս հայաշատ նահանգէն տխուր լուր ստացանք։

Մահացած է Փիէռ Սիմոնեանը՝ Պէյրութի երբեմնի հանրայայտ վարսաւիրանոցներէն «Սալոն Փիէռ»ի հիմնադիրն ու սեփականատէրը։

Այս մասին «Արեւելք» տեղեկութիւն ստացաւ հանգուցեալի հարազատներէն։

Հանգուցեալը, որ երկար ժամանակէ ի վեր հաստատուած էր Միացեալ Նահանգներ, մահացած է յետ յառաջացած տարիքին եւ հիւանդութեան՝ շրջապատուած իր սիրելիներով եւ հարազատներով: 

Կը նշուի՝ նուիրեալ հայր, ամուսին, սիրուած մեծ հայր Փիէռ Սիմոնեան, որ ունէր գաղափարական կուռ շաղուածք շնորհիւ իր խառնուածքին, կարողացած է տիրանալ բոլորի սիրոյն ու յարգանքին։

Մեծին հետ մեծ, ու փոքրին հետ ալ փոքր ըլլալով բոլորին սիրելի պարոն Փիէռը, սկսեալ Պէյրութի իր ժամանակներէն, մինչեւ Միացեալ Նահանգներ, միշտ ալ ապրած է հայրենիքի սէրը իր սրտին մէջ:

Ցանկացած սրտացաւ եւ «հայութեան օրակարգ»ով ապրող հայրենակիցի նման ան եւս մնացած է հայրենիքի կողքին, անկախ այնտեղ տիրող վարչակարգէն։ Հայաստանի վերանկախացման առաջին օրէն իսկ փութացած է օգնելու հայրենիքի նիւթապէս անապահով տասնեակ անձերու եւ զոհուած ազատամարտիկներու ընտանիքներուն՝ անշահախնդիր եւ անմնացորդ սիրով։ 

Անոր կորուստով բարի ժպիտ մը, գուրգուրոտ հայեացք մը եւ նուիրուածութեան վառ օրինակ կը մարի, այն  յոյսով, որ իր կիսատ մնացած գործը եւ նուիրական մօտեցումները կը շարունակուին իր ընտանիքի անդամներուն, հարազատներուն եւ բոլոր զինք սիրողներուն ճամբով։

Ստորեւ կը ներկայացնենք հարազատներուն կողմէ «Արեւելք»ին առաքուած մահազդը.

 

                                                            ՄԱՀԱԶԴ

 Սրտի դառն կսկիծով կը գուժենք մահը մեր սիրեցեալ ամուսնոյն, հօր, մեծ հօր, հօրեղբօր, մօրեղբօր, կեսրայրի, խնամիի եւ մեր համայնքի յայտնի ազգայիններէն Փիեռ Սիմոնեանի մահը որ պատահեցաւ Փետրուարի 7-ին, 2024-ին իր բնակարանին մէջ Կլենտէյլ, Քալիֆորնիա, յետ երկարատեւ հիւանդութեան։

ՏԻԱՐ ՓԻԵՌ ՍԻՄՈՆԵԱՆ

(Ծնեալ 1939-ին Լաթաքիա, Սուրիա)

 

Սգակիրներն են ՝

Այրի տիկին Ասպետուհի Սիմոնեան

Զաւակը՝ Տէր եւ տիկ. Սէմ եւ Օֆելիա Սիմոնեաններ եւ զաւակները՝ Քրիսթել եւ Փիեռ

Զաւակը՝ Տէր եւ տիկ. Հրայր եւ Լիզա Սիմոնեաններ եւ զաւակները՝ Փիեռ, Իզապէլ, Լիո եւ Էլայզա

Զաւակը՝ Տէր եւ տիկ. Հայկ եւ Սոսի Սիմոնեաններ եւ զաւակները՝ Փիեռ եւ Նիքոլեթ 

Զաւակը՝ Տէր եւ տիկ. Շանթ եւ Անգինէ Սիմոնեաններ եւ դուստրը՝ Քլօուի

Եղբօր Այրին՝ Տիկին Զապէլ Սիմոնեան եւ զաւակները՝ Սէմ, Պերճ, Սեդա եւ զաւակունք, Արա (Թեքսաս)

Եղբօր Այրին՝ Տիկին Անի Սիմոնեան եւ զաւակները՝ Մարալ, Արա, Սէմ եւ զաւակունք

Եղբօր Այրին՝ Տիկին Նուէր Սիմոնեան եւ զաւակները՝ Մարիեթ, Սիլվա եւ Ռիթա եւ զաւակունք, Սէմ (Լիբանան)

Քրոջ զաւակները՝ Գէորգ եւ Լուսինէ Հալէպլեաններ եւ զաւակունք

Սիւզի եւ Գաբօ Սահակեաններ եւ զաւակունք

Աներձագը՝ Տէր եւ տիկ. Համբարձում եւ Փօլա Ղազարեաններ եւ դուստրը՝ Անա (Ուիչիթա)

Քենին եւ քենեկալը՝ Տէր եւ տիկ. Մարիա եւ Մինաս Փափազեաններ եւ զաւակները՝ Հայկ, Վահան, Էօժենի (Լիբանան)

Եւ համայն Սիմոնեան, Ղազարեան, Հալէպլեան, Եանըքեան, Պասմաճեան, Աբարտեան, Ադամեան, Փափազեան, Պոյաճեան, Աւետիսեան, Տուրնայեան ընտանիքներ, խնամիները՝ Հզօր, Վարդանեան եւ Գրիգորեան իրենց ընտանիքներով։

 

Յուղարկաւորութեան արարողութիւնը տեղի պիտի ունենայ Մարտ 1, 2024 կեսօրէ ետք ժամը 12:30-ին Forest Lawn, Church of the Hills (White Church) Hollywood Hills գերեզմանատան մէջ։ Թաղման արարողութենէն ետք հոգեճաշ պիտի մատուցուի Կլենտէյլի Phoenicia Restaurant-ի մէջ, 343 N. Central ave., Glendale, CA., 91203:

Ողբացեալի հարազատներու խնդրանքով փոխան ծաղկեպսակի նուիրատուութիւններ կատարել Լիբանանի Թռչնոց Բոյնին:

In lieu of flowers Pierre Simonian, please make your donations for Bird’s Nest in Lebanon. Please make checks payable to:

   WESTERN PRELACY

   6252 Honolulu Ave.

   La Crescenta, CA., 91214