-3.91c
Երեվան
հնգ, նմբ 07
ՀՀ վարչապետ Նիկոլ Փաշինեան հանդէս եկած է ուղերձով՝ ուղղուած Հայ-ռուսական միջտարածաշրջանային 9-րդ համաժողովի մասնակիցներուն:
Ուղերձը ստորեւ.
«Յարգելի՛ բարեկամներ,
Տիկնա՛յք եւ պարոնա՛յք,
Ջերմօրէն ողջունում եմ հայ-ռուսական միջտարածաշրջանային իններորդ համաժողովի բոլոր մասնակիցներին:
Չնայած Ատրպէյճանի կողմից Հայաստանի Հանրապետութեան ինքնիշխան տարածքի նկատմամբ սանձազերծուած ագրեսիայի (յարձակման) հետեւանքով ստեղծուած բարդ իրավիճակին՝ մենք այնուամենայնիւ որոշեցինք չյետաձգել այսօր ծրագրուած աշխատանքային միջոցառումների անցկացումը՝ հաշուի առնելով դրանց կարեւորութիւնը հայ-ռուսական յարաբերութիւնների զարգացման տեսանկիւնից:
Հայաստանի եւ Ռուսաստանի միջեւ միջտարածաշրջանային համագործակցութիւնը կարեւոր դեր ունի մեր երկրների միջեւ դաշնակցային ռազմավարական գործընկերութեան զարգացման գործում՝ նպաստելով երկկողմ համագործակցութեան ներուժի հետագայ ընդլայնմանը։
Գաղտնիք չէ, որ hամաժողովների նպատակը առեւտրատնտեսական, կրթական, գիտական, մշակութային եւ մի շարք այլ ոլորտներում նոր կապերի հաստատումն է եւ արդէն իսկ հաստատուած գործընկերային յարաբերութիւնների վերաիմաստաւորումը:
Հայաստանի Հանրապետութեան կառավարութեան համար տարածքների համաչափ զարգացումը առաջնահերթ խնդիրներից մէկն է: Համոզուած եմ, որ միջտարածաշրջանային հորիզոնական շփումները հիանալի հնարաւորութիւն են ստեղծում մարզերի գիտակրթական եւ մշակութային կեանքի զարգացման, ինչպէս նաեւ մեր երկրների եւ ժողովուրդների բարեկամական յարաբերութիւնների ամրապնդման համար։
Թէեւ այս համաժողովը թուով իններորդն է, եւ միջտարածաշրջանային մակարդակում արդէն իսկ կան ձեւաւորուած կապեր եւ գործընկերային յարաբերութիւններ, այնուհանդերձ, կան խնդիրներ, որոնք պէտք է բարձրաձայնուեն եւ տարեցտարի լուծումներ ստանան:
Իւրաքանչիւր տարի համաժողովներն անցկացւում են նոր խորագրերի ներքոյ, եւ այս տարուայ «Հայ-ռուսական համագործակցութիւն. նոր մարտահրաւէրներ եւ հնարաւորութիւններ» խորագիրն աւելի քան արդիական է եւ յաւակնոտ:
Մեզ համար հեռանկարային է միջտարածաշրջանային մակարդակում կարեւոր նախագծերի ակտիւ (աշխուժ) իրականացումը, ինչն ուղղուած է մեր երկրների ազգային տնտեսութիւնների հետագայ աճի ապահովմանը, համաշխարհային շուկաներում նրանց մրցունակութեան ամրապնդմանը, առաջադէմ տեխնոլոգիաների (արհեստագիտութիւններ) ներդրմանը։
Կասկածից վեր է, որ միջտարածաշրջանային ապակեդրոնացուած համագործակցութեան ողջ ներուժից օգտուելու պարագայում, մեզ կը յաջողուի նոր որակ հաղորդել մեր մարզերի բնակիչների կեանքին։
Այս համատեքստում (պարունակին մէջ) կարող ենք արձանագրել, որ այսօրուայ Համաժողովը եւս մէկ քայլ է հայ-ռուսական ապակեդրոնացուած համագործակցութեան առաջմղման գործում, որը ձեւաւորուել եւ զարգանում է երկու երկրների տարածաշրջանների հաստատակամութեան եւ նախաձեռնողականութեան շնորհիւ:
Եւս մէկ անգամ ողջունում եմ Համաժողովի մասնակիցներին՝ յոյս յայտնելով, որ այս հարթակում կը գրանցուեն շօշափելի արդիւնքներ, որոնք մեր երկու երկրների միջեւ առկայ միջտարածաշրջանային համագործակցութեան կը հաղորդեն նոր բովանդակութիւն:
Շնորհակալութիւն»:
