Արեվելք - Արևելք լրատուական

170
29/04/2023

ՀՀ քաղաքացին պարտաւոր է հպարտ լինել․ Նիկոլ Փաշինեանի շնորհաւորական ուղերձը՝ «Քաղաքացիի օրուան» առթիւ

ՀՀ վարչապետ Նիկոլ Փաշինեան շնորհաւորական ուղերձ յղած է «Քաղաքացիի օրուան» կապակցութեամբ։

Ուղերձին մէջ ըսուած է․

«Սիրելի ժողովուրդ, Հայաստանի Հանրապետութեան հպա՛րտ քաղաքացիներ,

Այսօր նշում ենք Քաղաքացու օրը եւ ի՞նչ է դա նշանակում: Մենք ընդգծում ենք Հայաստանի Հանրապետութեան ժողովրդավարական էութիւնը, որտեղ ժողովուրդը, Քաղաքացիների հաւաքականութիւնն իշխանութեան միակ աղբիւրն է, միակ կրողը:

2018 թուականի Ժողովրդական, ոչ բռնի, թաւշեայ յեղափոխութիւնից յետոյ Հայաստանի Հանրապետութիւնում որեւէ մակարդակի որեւէ ընտրութիւն չի կեղծուել եւ Քաղաքացին հնարաւորութիւն է ունեցել կայացնել որոշումներ՝ աւագանի, համայնքի ղեկավար, Ազգային ժողով եւ վարչապետ ընտրել ազատ կամարտայայտութեամբ: Ընտրողների ազատ կամարտայայտութիւ՛նն է դարձել իշխանութեան ձեւաւորման միակ բանաձեւը:

Հենց սա էր 2018 թուականի Յեղափոխութեան առաջնային եւ առանցքային նպատակներից մէկը, որ իրագործուած է լիովին: Հայաստանի Հանրապետութիւնում չկան քաղբանտարկեալներ, չկայ որեւէ միտք, գաղափար, տեղեկատւութիւն, որ հնարաւոր չէ հանրութեանը հասցնել հեռուստատեսային եթերով կամ զանգուածային լրատւութեան միջոցներով, սոցիալական ցանցերը, քաղաքական, հանրային եւ տնտեսական գործունէութիւնն ազատ են լիովին:

Մեր ընդդիմախօսներն ասում են՝ թող չունենայինք ժողովրդավարութիւն, բայց չունենայինք նաեւ այն աղէտալի ձախողումները, որ ունեցանք, մասնաւորապէս, 44-օրեայ պատերազմում եւ դրանից յետոյ:

Բայց գոնէ այսօր պիտի համարձակութիւն ունենամ ասելու. այդ աղէտները վրայ հասան երկար տարիներ ժողովրդավարութիւն, օրինականութիւն, քաղաքացիական ազատ բանավէճ չունենալու հետեւանքով, այն տաբուների, կաղապարների եւ «ճշմարտութիւնների» պատճառով, որոնք ստեղծուել էին բարեհունչ վերնագրերի ներքոյ, բայց ո՛չ յանուն պետականութեան: Մենք ժամանակին չկարողացանք յաղթահարել այդ տաբուներն ու կաղապարները եւ դա էր, թերեւս, մեր մեծագոյն ձախողումը:

Այդ տաբուների գործադրմամբ այսօր էլ փորձ է արւում թոյլ չտալ քաղաքական, քաղաքացիական եւ քաղաքագիտական մտքի զարգացումը, բայց ապագայի առաջ մեր ունեցած պատասխանատւութիւնը պիտի պարտադրի մեզ ասել՝ Հայրենիքը պետութիւնն է, որը պիտի լինի կոնկրետ, սէրը Հայրենիքի նկատմամբ օրինապահութիւնն է, քաղաքացիութիւնն ինքնութիւն է, անվտանգութեան երաշխաւորը խաղաղութիւնն է եւ այս յենասիւների վրայ պիտի կառուցուի Ապագան:

Իսկ հպա՞րտ է արդեօք Հայաստանի Հանրապետութեան քաղաքացին:

Պիտի՛ եւ պարտաւոր է լինել հպարտ, որովհետեւ այսպէ՛ս դիմակայել դարակազմիկ մարտահրաւէրներին՝ երկիրն ու տնտեսութիւնը զարգացնելով, ժողովրդավարութեան էութեանն ու արժէքներին չդաւաճանելով՝ հպարտութեան իրական աղբիւրն է:

Եւ ուրեմն՝

Կեցցէ՛ Ազատութիւնը,

Կեցցէ՛ Հայաստանի Հանրապետութիւնը,

Կեցցե՛ն մեր երեխաները, որ ապրելու են Ազատ եւ Երջանիկ Հայաստանում:

Սիրում եմ բոլորիդ, հպարտանում եմ բոլորովդ եւ խոնարհւում եմ բոլորիդ առջեւ»։