image

Հայաստանը Չեխիոյ ու Խրխըզստանի մէջ ռազմական կցորդներ պիտի ունենայ

Հայաստանը Չեխիոյ ու Խրխըզստանի մէջ ռազմական կցորդներ պիտի ունենայ

Կառավարութեան նիստի ընթացքին ընդունուած որոշումներու համաձայն՝ Հայաստանի Հանրապետութիւնը Չեխիոյ եւ Ղրղզստանի մէջ ռազմական կցորդներ պիտի ունենայ։

Հայաստանի եւ Չեխիոյ միջեւ ռազմական եւ ռազմատեխնիկական ոլորտի մէջ առկայ համագործակցութեան մեծ ներուժը եւ չեխական կողմի՝ փոխգործակցութիւնը խորացնելու ուղղութեամբ վերջին ժամանակաշրջանին ցուցաբերած մեծ հետաքրքրութեամբ պայմանաւորուած է Չեխիոյ Հանրապետութեան մէջ Հայաստանի Հանրապետութեան ռազմական կցորդ ունենալու անհրաժեշտութիւնը:

Չեխիոյ մէջ ռազմական կցորդի հաստիքը պիտի համատեղուի Գերմանիոյ Դաշնային Հանրապետութեան մէջ ՀՀ դեսպանութեան կից ռազմական կցորդի կողմէ:

Որոշումը հնարաւորութիւն պիտի ստեղծէ ՊՆ-ի համար Չեխիոյ մէջ ռազմական կցորդի միջոցով երկու երկիրներու պաշտպանական գերատեսչութիւններու արդիւնաւէտ աշխատանքի համար, այն նոր որակ պիտի հաղորդէ ռազմական ոլորտի մէջ գործընկերային յարաբերութիւններուն եւ պիտի նպաստէ բարեկակամական կապերու հետագայ խորացման, ինչպէս նաեւ ռազմական եւ ռազմատեխնիկական համագործակցութեան հնարաւորութիւններու ընդլայնման:

Նախագիծի ընդունմամբ Հայաստանի Հանրապետութիւնը պիտի ունենայ Չեխիոյ մէջ հաւատարմագրուած ռազմական կցորդ, որ պիտի իրականացնէ պետութիւններու ռազմական եւ ռազմաքաղաքական համագործակցութեան համադրման եւ համակարգման աշխատանքները, պիտի ամրապնդէ երկկողմ փոխգործակցութեան մակարդակը, ինչպէս նաեւ պիտի ներկայացնէ երկու երկիրներու միջեւ համագործակցութեան հեռանկարային զարգացման վերաբերեալ առաջարկութիւններ:

Ինչ կը վերաբերի Ղրղզստանին, ապա երկու երկիրներու միջեւ համագործակցութիւնը կ՚իրականացուի հիմնական ՀԱՊԿ-ի, ԵԱՏՄ-ի եւ ԱՊՀ-ի կազմակերպութիւններու շրջածիրէն ներս՝ բազմակողմ համագործակցութեան ձեւաչափով: Սակայն երկու երկիրները պաշտպանութեան ոլորտի մէջ, ինչպէս նաեւ ռազմատեխնիկական բնագաւառի մէջ յարաբերութիւններու հետագայ զարգացման զգալի ներուժ եւ հեռանկարներ ունին:

Ռազմական կցորդի առկայութիւնը Ղրղզստանի մէջ պիտի նպաստէ երկու երկիրներու միջեւ պաշտպանութեան ոլորտի մէջ փոխգործակցութեան հետագայ զարգացման, նոր թափ պիտի հաղորդէ երկու երկիրներու միջեւ պաշտպանական ոլորտի մէջ համատեղ միջոցառումներու իրականացման: Ռազմական կցորդի առկայութիւնը պիտի ապահովէ պաշտպանութեան ոլորտի մէջ հայ-ղրղզական յարաբերութիւններու բարձրացման գործընկերութեան աւելի բարձր մակարդակի:

Ղրղզստանի մէջ ռազմական կցորդի հաստիքը պիտի համատեղուի Ղազախստանի Հանրապետութեան մէջ ՀՀ դեսպանութեան կից ռազմական կցորդի կողմէ: