8.09c
Երեվան
չրք, սպտ 24
Հայաստանի նկատմամբ ռազմական սպառնալիքները շատ ցած են։ Այս մասին յայտարարած է արտաքին հետախուզութեան պետ Քրիսթինէ Գրիգորեանը Երեւանի մէջ կազմակերպուած «Համապարփակ անվտանգութիւն եւ դիմակայութիւն 2025» համաժողովէն ետք լրագրողներու հետ ճեպազրոյցի ժամանակ։
«Նախորդ մի քանի ամիսների համեմատութեամբ կարող ենք ասել այս պահին անվտանգային սպառնալիքները շատ ցածր են։ Շատ կարեւոր է երկու բառը՝ «այս պահին», ժամանակի մէջ սպառնալիքների աճը եւ փոփոխութիւնները շատ արագ է տեղի ունենում, այս պահին եւ իրաւամբ մենք գնահատում ենք, որ ռազմական սպառնալիքները շատ ցածր են, քան, օրինակ՝ մի քանի ամիս առաջ, մի տարի առաջ եւ այլն։ Բայց սպառնալիքներ կան մեր ժողովրդավարութեան նկատմամբ»,-ըսած է Գրիգորեանը։
Ըստ Գրիգորեանի՝ պէտք չէ թերագնահատել ժողովրդավարութեան սպառնալիքները, որոնք մեծամասամբ խառնածին (հիպրիտային) սպառնալիքներ են։ Հարցին, թէ որ պետութիւնները Հայաստանի նկատմամբ խառնածին սպառնալիք կը ներկայացնեն, Գրիգորեանը նշած է․ «Ժողովրդավարութեան նկատմամբ սպառնալիքները չեն գալիս մէկ պետութիւնից կամ մէկ դերակատարից, դրանք որպէս կանոն շատ դէպքերում գալիս են համակցուած, գալիս են առանձին-առանձին։ Ես կարող եմ վստահ պնդել, որ չկայ որեւէ պետութիւն, որի ժողովրդավարութեան կամ կառավարման կարգի նկատմամբ սպառնալիքները գալիս են մէկ դերակատարից կամ մէկ պետութիւնից, եւ հասկացէք Հայաստանը բացառութիւն չէ»։
