Երէկ Պէյրութ հասած Էմաննիւէլ Մաքրոնը օդակայանէն անմիջապէս գացած է արաբական երգի աստղ Ֆէյրուզի բնակարան: Այդ մասին կը յայտնեն Էլիզէի պալատի աղբիւրները:
Կը նշուի, որ Ֆրանսայի նախագահ Մաքրոնի եւ երգչուհի Ֆէյրուզի հանդիպումը խորհրդանշանական է, այն իմաստով, որ երգչուհին կը համարուի Լիբանանի մէջ ապրող բոլոր համայնքներու միասնութեան խորհրդանիշը: Անոնք քննարկած են Լիբանանի մէջ ստեղծուած ծանր կացութիւնը:
84-ամեայ երգչուհին կը բնակի Լիբանանի Ռապիէ շրջանին մէջ: Աւելի վաղ «Արեւելք»ի հետ հարցազրոյցի ժամանակ հայ խմբավար Կարէն Դուրգարեանը, որ համագործակցած է Ֆէյրուզի հետ, գնահատելով Ֆէյրուզի արուեստը, ըսած էր. «Ֆէյրուզը սիրոյ, աղօթքի երգիչ է: Ան իր ողջ արուեստով եղած է խաղաղութեան առաջամարտիկ»:
Նշենք, որ Ֆրանսայի նախագահը 4 օգոստոսի պայթումէն ետք երկրորդ անգամ կը ժամանէ Լիբանան: Ըստ դիտարկումներու, Ֆրանսան կարեւոր դեր կը ստանձնէ Լիբանանը ճգնաժամէն դուրս բերելու վերաբերեալ: