32.09c
Երեվան
հնգ, հնս 26
2025 թուականի Հոկտեմբեր 29-էն մինչեւ Նոյեմբեր 23, Փարիզի Palais de Tokyo թանգարանին մէջ տեղի պիտի ունենայ նշանաւոր օծանելիքագործ Ֆրանսիս Քիւրքճեանի ցուցահանդէսը՝ «Parfum, Sculpture de l’invisible» («Օծանելիք՝ անտեսանելիի քանդակ») խորագրով։ Ըստ WWD-ի, նախագիծը պիտի ըլլայ յարգանքի տուրք մատուցելու համար վարպետի համարձակ եւ ոչ աւանդական մօտեցման՝ օծանելիքի արուեստին։
Իր արագ վերելքէն ի վեր՝ Քիւրքճեանը 1995 թուականին դարձաւ ոլորտի աստղ՝ ընդամէնը 24 տարեկանին Ժան Փոլ Կոթիէի համար ստեղծելով յայտնի Le Male օծանելիքը։ Ան միշտ կոտրած է սովորականի սահմանները։ Անոր ստորագրութեամբ հիմնուած Maison Francis Kurkdjian ապրանքանիշը եւ Dior-ի մէջ օծանելիքի ստեղծման տնօրէնութեան պաշտօնը ամրապնդած են անոր հեղինակութիւնը՝ որպէս մեր ժամանակներու ամենաստեղծագործ օծանելիքագործներէն մէկը։
Palais de Tokyo-ի տարածքին մէջ գտնուող Saut du Loup սրահին մէջ ցուցահանդէսը պիտի ներկայացնէ անոր ստեղծագործական ճամբորդութեան երեսուն տարիները՝ ներառեալ օծանելիքի անսպասելի ձեւերը՝ բուրաւէտ օճառի պղպջակներէն մինչեւ շատրուաններու բոյր եւ նոյնիսկ լուացքի նիւթեր։ «Ես կը գնահատեմ ժառանգութիւնը, բայց կ՚ատեմ աւանդոյթը», — ըսած է Քիւրքճեան 2020 թուականին, WWD-ին տուած հարցազրոյցի մը ընթացքին՝ ընդգծելով իր փիլիսոփայութիւնը։
Ի՞նչ կը սպասէ ցուցահանդէսի այցելուներուն.
Կազմակերպիչներու համաձայն՝ «օծանելիքը՝ իր բոլոր դրսեւորումներով, նոյնիսկ՝ ամենաանսպասելիներով, պիտի ըլլայ ցուցահանդէսի կարմիր թելը, որ կը հրաւիրէ դիտողը զգալու, տեսնելու եւ ընկալելու աշխարհը այլ կերպ»։
«Parfum, Sculpture de l’invisible» ցուցահանդէսը կը խոստանայ ըլլալ Փարիզի աշնան ամենաանսովոր արուեստի միջոցառումներէն մէկը՝ համադրելով բարձր արուեստը, արհեստագիտութիւնը եւ օծանելիքը՝ զգայական փորձառութեան եզակի տարածքի մէջ։
