6.09c
Երեվան
չրք, փտր 19
Երիտասարդութեան եւ մարմնակրթութեան հարցերու նախարար դոկտ. Նորա Պայրագտարեան երէկ պաշտօնապէս նախկին նախարար Ժորժ Քալլասէն ստանձնեց իր պաշտօնը:
Քալլաս շնորհաւորեց նախարար Պայրագտարեանը` «իշխանութեան ամենայն բարիք խոստացող առաջին կառավարութեան» անդամ նշանակուելուն առիթով, եւ ըսաւ. «Ես ուրախ եմ, որ յանձնումն ու ստանձնումը տեղի կ՛ունենան երկու դասախօսներու միջեւ Լիբանանեան համալսարանի, որ միշտ կոչուած է «հանրապետութեան խորհրդատուն», եւ յաջողութիւն մաղթեց նոր նախարարին:
Պայրագտարեան յայտնեց. «Ուրախ եմ ու պատիւ կը զգամ այս կառավարութեան մէջ երիտասարդութեան եւ մարմնակրթութեան հարցերու նախարար նշանակուելով հանրապետութեան նախագահին ու վարչապետին վստահութեան արժանանալուս համար` ծառայելու համար մեր հայրենիքին` սիրելի Լիբանանին, ինչպէս նաեւ ուրախ եմ այս նախարարութիւնը Լիբանանեան համալսարանի գործընկերէս ստանձնելուս համար»:
«Այս կառավարութիւնը կը կրէ բարեկարգման ու կառուցման նշանաբանը` փոփոխութեան հիմքը դնելու եւ յառաջիկայ փուլին ենթահող պատրաստելու համար, ինչպէս վարչապետը առաջարկեց: Ուստի պէտք է ծրագրենք, ուսումնասիրենք, քննարկենք, առաջարկենք ու գործենք ապագայ Լիբանանի հիմքը դնելու համար, եւ Լիբանանի աւելի լաւ ապագայի յոյսի գրաւականը անկասկած անոր երիտասարդութիւնն է: Երիտասարդութիւնը այն իսկական ուժն է, որ կրնայ Լիբանանը կանգնեցնել յառաջադէմ պետութիւններու շարքին: Մեկնելով այս իրողութենէն, առաջնահերթութիւնս պիտի ըլլայ երիտասարդութեան աջակցիլ եւ զանոնք կարող դարձնել իրենց առջեւ գտնուող դռները բանալու` ազդու մասնակցութիւն ունենալու համար արդի եւ զարգացած ընկերութեան կառուցման մէջ», նշեց նախարարը:
Ան նշեց. «Պիտի ձգտինք մարմնակրթական դիւանագիտութեան մշակման, գործադրութեան եւ ջատագովման»: Նախարար Պայրագտարեան աւելցուց, որ անհամբեր կը սպասէ բարեկամ երկիրներու հետ յարաբերութիւններու սերտացման:
Նախարարը յայտարարեց, որ նախարարութեան թղթածրարին լաւապէս ծանօթանալէ ետք պիտի յայտարարէ Լիբանանի մէջ երիտասարդութեան ու մարմնակրթութեան ռազմավարութեան գործադրման ծրագիր մը, որուն առաջարկները պիտի գան նոյնինքն երիտասարդներէն եւ մարզիկներէն:
«Այս նախարարութիւնը պիտի ըլլայ հարթակ մը` լսելու երիտասարդներուն ձգտումները, եւ պիտի ջանայ զանոնք ռազմավարական ծրագիրի ճամբով կառավարական քաղաքականութեան վերածել», ըսաւ Պայրագտարեան:
«Կը խոստանամ կարելի ջանքս թափել մեր երիտասարդներուն ու մարզիկներուն ծառայելու` պատասխանատուութեամբ, թափանցիկ կերպով եւ հաւատարմութեամբ` մեկնելով հաւատքէս, թէ Լիբանանի ապագան կախեալ է անոր երիտասարդութեան կամքէն ու ստեղծագործական կարողութիւններէն, եւ բոլորս ալ այս երթին մէջ գործընկերներ ենք», եզրափակեց նախարարը:
Լուրը՝ «Ազդակ»էն
