6.09c
Երեվան
երկ, դկտ 23
Հայաստանի եւ Ատրպէյճանի միջեւ բանակցութիւններուն մէջ կան հարցեր, ուր միջնորդներու ներկայութիւնը պարտադիր է:
«Արմէնփրէս»-ի հաղորդմամբ՝ այս մասին ըսած է Հայաստանի արտաքին գործոց փոխնախարար Մնացական Սաֆարեանը՝ անդրադառնալով հարցին, թէ արդեօք Հայաստանը կո՞ղմ է Հայաստանի եւ Ատրպէյճանի ղեկավարներու՝ առանց միջնորդներու հանդիպման:
«Մենք բազմիցս նշել ենք, որ կան հարցեր, որտեղ միջնորդների առկայութիւնը պարտադիր է: Կան հարցեր, որտեղ միջնորդների ներկայութիւնը շատ կարեւոր դեր ունի»,-ըսած է արտաքին գործոց փոխնախարարը:
Ատոնք, օրինակ, այն հարցերն են, որոնք կը վերաբերին Լեռնային Ղարաբաղէն բռնի տեղահանուած բնակչութեան իրաւունքներուն: Այս հարցով հայկական կողմը կը կարեւորէ միջազգային մեխանիզմներու առկայութիւնը: Կան այլ հարցեր եւս, ուր երաշխիքները կարեւոր են:
«Այս պահին բռնի տեղահանուած բնակչութեան իրաւունքների հարցը բարձրաձայնւում է Հայաստանի կողմից»,-ըսած է Սաֆարեանը:
