6.09c
Երեվան
հնգ, մրտ 13
Վարչապետ Նիկոլ Փաշինեանի շնորհաւորական ուղերձ յղած է Աշխատանքի եւ աշխատաւորներու համերաշխութեան միջազգային օրուան առթիւ, որուն մէջ ըսուած է․
«Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,
Այսօր նշում ենք Աշխատանքի եւ աշխատաւորների համերաշխութեան միջազգային օրը:
Սա իսկապէս կարեւոր օր է, որովհետեւ այն ամէնը, ինչ տեսնում ենք մեր միջավայրում, այն ամէնը, ինչի հետ առնչւում ենք, պարտադիր կերպով ինչ-որ մէկի կատարած կամ չկատարած աշխատանքի արդիւնք կամ հետեւանք է: Կատարուած եւ չկատարուած, յաջող եւ ոչ այնքան յաջող աշխատանքն այն է, ինչ մեզնից իւրաքանչիւրին դարձրել է այնպիսին, ինչպիսին կանք:
Աշխատանքը, աշխատանքի ընկալումը, աշխատանքային պայմաններն այն են, ինչ ժամանակակից աշխարհը դարձրել է այնպիսին, ինչպիսին այն կայ: Վերջին հարիւրամեակում աշխատանքի ընկալումն էականօրէն փոխուել եւ փոխւում է մեծ արագութեամբ:
Եթէ նախկինում աշխատանքը մարդու ազատութիւնը կաշկանդող գործօն էր համարւում, այսօրուան ընկալումն այն է, որ աշխատանքը մարդուն ազատութիւն, բարեկեցութիւն եւ երջանկութիւն պէտք է բերի: Ժամանակակից աշխարհում սիրած աշխատանքով զբաղուելը եւ կատարած աշխատանքից հաճոյք ստանալը երջանկութեան կարեւորագոյն գործօն է եւ բաղադրիչ: Ժամանակակից աշխարհում հնարաւոր չէ բարեկեցութիւն կառուցել առանց աշխատանքի: Եւ աշխատանքի արդիւնքում ձեռքբերուած վաստակը մարդուն ազատ ապրելու, այդ թւում՝ լայնօրէն ճամբորդելու հնարաւորութիւն պիտի տայ:
Սրանք, ի հարկէ, իտէալներ են, բայց այդ իտէալներն արդէն շատ դէպքերում հասանելի են, եթէ աշխատանքը հիմնուած է բարձր որակաւորման, այսինքն՝ կրթութեան վրայ, այն ըմբռնումով, որ կրթութիւնը ոչ միայն մանկութեան ու պատանեկութեան գործ է, այլեւ ցկեանս անելիք:
Իտէալի եւ իրականութեան մէջ, սակայն, ցաւալիօրէն զգալի ճեղք կայ, որովհետեւ այսօր Հայաստանի Հանրապետութիւնում հազարաւոր մարդիկ ապրում են աղքատութեան պայմաններում: Նրանց մի մասն ունեն աշխատանք, միւս մասը՝ գործազուրկ են:
Բայց ինչպէս նախկինում, այնպէս էլ հիմա համոզուած եմ՝ աղքատութիւնը հնարաւոր է յաղթահարել միայն աշխատանքով՝ զուգորդուած կրթութեամբ եւ որակաւորման բարձրացմամբ: Այս բանաձեւը, ցաւօք, իրատեսօրէն հնարաւոր չի լինի կիրառել աւագ սերնդի այն ներկայացուցիչների համար, ովքեր իրենց սոցիալական վիճակով նման բանաձեւի կիրառման կարիք կ՚ունենային:
Բայց կառավարութեան ջանքերն ուղղուած են միջին սերնդի ներկայացուցիչների համար վերապատրաստումների, որակաւորման բարձրացման հնարաւորութիւններ ու մոտիւացիա ստեղծելուն:
Աղքատութեան յաղթահարման ճանապարհին ամենակարեւոր երկարաժամկէտ անելիքը կրթութեան ոլորտի՝ նախադպրոցական կրթութեան, հանրակրթութեան, մասնագիտական կրթութեան եւ ուսուցման, բարձրագոյն եւ յետբուհական կրթութեան բարեփոխումներն են՝ այն նպատակադրմամբ, որ կրթական համակարգը պէտք է բացայայտի մարդու տաղանդը, նրան սիրած աշխատանքով զբաղելու եւ աշխատանքի մէջ երջանիկ լինելու, ազատ եւ բարեկեցիկ ապրելու հնարաւորութիւն տայ:
Միանշանակ կարելի է պնդել. այսօր որեւէ մարդու աղքատութեան մէջ ապրելու առանցքային պատճառը ժամանակին նրա չստացած կրթութիւնն է, կամ ստացած կրթութեան ոչ պատշաճ որակը, կամ ցկեանս կրթութեան տրամաբանութիւնից դուրս լինելը:
Իմ համոզմունքն է, որ իւրաքանչյուր մարդ տաղանդաւոր է, եւ պատշաճ կրթութիւնը կարող է բացայայտել նրա տաղանդն այնպէս, որ մարդն աշխատանքով իր բարեկեցութիւնը կառուցելու հնարաւորութիւն ունենայ: Ոչ աշխատունակ կամ սահմանափակ աշխատունակ մարդկանց պարագան բոլորովին այլ իրադրութիւն է, չնայած վերջին խմբի մեր համաքաղաքացիներին էլ ասուածն առնուազն որոշ մասով կարող է առնչուել: Ինչ վերաբերում է աշխատանքային իրաւունքներին՝ կարեւորագոյն այս խնդրի լուծումը ոչ միայն պատշաճ օրէնքների ու կարգաւորումների մէջ է, այլեւ գործատուների եւ գործաւորների շահագրգիռ եւ գիտելիքահեն յարաբերութիւնների:
Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,
Շնորհաւորում եմ բոլորիս Աշխատանքի եւ աշխատաւորների համերաշխութեան միջազգային օրուայ առիթով, եւ կրկին ուզում եմ յատուկ շնորհակալութիւն յայտնել աշխատող, արդիւնք ստեղծող եւ օրէնքով սահմանուած հարկերը վճարող մեր քաղաքացիներին ու մեր երկրի բնակիչներին: Մեր պետութիւնը հիմնուած է նրանց աշխատանքի վրայ եւ նրանց աշխատանքն արժանի է խոնարհումի:
Փա՛ռք նահատակներին եւ կեցցէ՛ Հայաստանի Հանրապետութիւնը»:
