15.09c
Երեվան
հնգ, հկտ 02
Այսօր լրագրողները ճեպազրոյցի ընթացքին հարց ուղղած են Ազգային Ժողովի նախագահ Ալեն Սիմոնեանին 2020 թուականի սեպտեմբեր 27-ին սանձազերծուած 44-օրեայ ռազմական գործողութիւններու հանգամանքներու ուսումնասիրման նպատակով ստեղծուած քննիչ յանձնաժողովի զեկոյցը լիագումար նիստերու օրակարգ ներառել-չներառելու մասին:
Սիմոնեանը յայտնած է, որ ինքը Անդրանիկ Քոչարեանին (ՀՀ ԱԺ պաշտպանութեան եւ անվտանգութեան հարցերու մշտական յանձնաժողովի եւ քննիչ յանձնաժողովի նախագահ - խմբ.) ըսած է, որ պէտք է ինչ-որ լուծում գտնուի, եւ իրաւական առումով ինչ խնդիրներ գոյութիւն ունին:
Ան անդրադարձած է մամուլի մէջ տեղ գտած տեղեկութիւններուն, թէ որոշ միտում կայ՝ զեկոյցը չհրապարակելու, նշած է՝ խօսքը ոչ թէ հրապարակել-չհրապարակելու մասին է, այլ հրապարակելու ձեւի:
«Այնուամենայնիւ, զեկոյցը հրապարակուելու է, չի կարող չհրապարակուել, այլ հարց է, թէ դա ինչ ձեւաչափով է արուելու, որովհետեւ նոյնիսկ եթէ դա մտնէր լիագումար նիստ, չէր կարող եւ չի կարող, միեւնոյնն է, դա լինելու էր փակ ֆորմատով»,- նշած է Սիմոնեանը՝ չբացառելով, որ կրնան փակ ձեւաչափով լսումներ ըլլալ:
Անոր խօսքով՝ հնարաւոր չէ զեկոյց, ուր մեր զօրամասերու, զինուած ուժերու վերաբերեալ տեղեկութիւնները հնչեն ուղիղ եթերով:
«Հիմա քննարկում ենք, որ իրաւական ձեւակերպում տանք»,- տեղեկացուցած է Ազգային Ժողովի նախագահը՝ առաջարկելով հիմք ընդունիլ «Ազգային ժողովի կանոնակարգ» օրէնքը՝ յանձնաժողով ստեղծելու մասին:
Լրագրողները յիշեցուցած են, որ Քոչարեանը յայտնած էր, որ համաձայն Հայաստանի Հանրապետութեան «Ազգային ժողովի կանոնակարգ» սահմանադրական օրէնքի 25-րդ յօդուածի՝ Ազգային Ժողովի նախագահին ուղարկուած է 44-օրեայ ռազմական գործողութիւններու հանգամանքներու ուսումնասիրման նպատակով ստեղծուած քննիչ յանձնաժողովի զեկոյցը:
Ի պատասխան՝ Սիմոնեանը պարզաբանած է՝ պատգամաւորը նախ՝ իրաւական առումով չէ ալ յանձնած զայն:
Ան առաջարկած է դիմել Անդրանիկ Քոչարեանին՝ բացատրութիւններու նպատակով:
«Իր կողմից խնդիր չկայ, սա մեկնաբանութեան խնդիր է: Իր կողմից սխալ է մեկնաբանւում [«Ազգային ժողովի] կանոնակարգ օրէնքը»,- նշած է Սիմոնեանը՝ յայտնելով, որ ունի տուեալ հարցի վերաբերեալ Ազգային Ժողովի պետաիրաւական յանձնաժողովի պատասխանը, Ազգային Ժողովի իրաւաբանական վարչութենէն պատասխան, որոնք «բոլորը միանման են»:
Ճշդող հարցին՝ ինչի հետ կապուած միանման են, Սիմոնեանը պարզաբանած է՝ որ լիագումար նիստեր մտցնելու իրաւական հիմք չկայ, եւ ատոր համար ունի ոչ միայն իր կարծիքը, այլեւ համապատասխան երեք հիմնարկի պատասխանը:
«Պարոն Քոչարեանը կարող է ամէն ձեւ մեկնաբանել, դա իր իրաւունքն է, բայց ես նախադէպային իրաւունքով չեմ առաջնորդուելու»,- աւելցուցած է Ազգային ժողովի նախագահը:
Անոր խօսքով՝ զեկոյցը, եթէ անգամ ներկայացուէր լիագումար նիստերու ընթացքին պիտի ըլլար փակ տրամաբանութեան մէջ:
