15.09c
Երեվան
չրք, սպտ 18
Օրեր առաջ Ժընեւի մէջ իր մահկանացուն կնքած Նազարէթ Սիրմաքէշ երէկ յանձնուած է հողին։ Այս մասին «Արեւելք»ին տեղեկացուցին Ժընեւէն, նշելով նաեւ, որ
յուղարկաւորութեան արարողութիւնը կատարուած է Ժընեւի Սուրբ Յակոբ առաջնորդանիստ եկեղեցւոյ մէջ։
Մեր ունեցած տուեալներով Սիրմաքէշի Ազգային թաղումին ներկայ գտնուած են Մայր Աթոռի ներկայացուցիչներ Տ. Խաժակ արք. Պարսամեան (Վատիկանի մօտ Մայր Աթոռի յատուկ պատուիրակ) եւ Տ. Եզրաս արք. Ներսէսեան (Առաջնորդ Ռուսաստանի եւ Նոր Նախիջեւանի թեմի), ինչպէս նաեւ Արցախի Հանրապետութեան գործող նախագահ Տիար Բակօ Սահակեան եւ Արցախի քաղաքական գործիչ Տիար Արայիկ Յարութիւնեան։
Յաւուր պատշաճի դամբանականով հանդէս եկած է Տ. Խաժակ Սրբազան, որ իր խօսքին մէջ կարեւորած է հանգուցեալին ազգային խնդիրներուն վերաբերեալ ցոյց տուած նախանձախնդրութիւնը եւ մինչեւ իր կեանքի վերջին պահը մեր ժողովուրդին օգտակար ըլլալու հանգամանքը։
Իր կարգին Զուիցերիոյ թեմի առաջնորդական տեղապահ Տ. Գուսան ծ. Վրդ. Ալճանեան ընթերցած է Մայր Աթոռի գահակալ Ն.Ս. Օ.Տ.Տ. Գարեգին բ.ն Ամենայն Հայոց կաթողիկոսի այս առթիւ պատրաստուած գիրը։
Կարդացուած է նաեւ ՀՀ նախագահ Արմէն Սարգսեանի ու վարչապետ Նիկոլ Փաշինեանի յարգանքի գիրերը։
Յուղարկաւորութեան եւ թաղման արարողութեան ներկայ եղած են մեծ թիւով ազգային-հասարակական գործիչներ, գործարարներ ու նաեւ Ժընեւի համայնքի անդամներ։
Յիշեցնենք, որ Նազարէթ Սիրմաքէշ հայրն էր ազգային յայտնի բարերար Վարդան Սիրմաքէշին։
