29.82c
Երեվան
չրք, հնս 17
Վերջին շրջանին լրատուամիջոցներուն մէջ կը տարածուի տեսակէտ, որ ոստիկանութիւնը բիրտ ուժ կը կիրառէ քաղաքացիներուն նկատմամբ: «Հասկանում եմ, որ այդ եզրոյթը ականջահաճոյ է, սակայն պէտք է տանք յստակ իրաւական գնահատական, առաւել ընդունելի է անհամաչափ ուժ եզրոյթը», ըսած է ՀՀ փոխոստիկանապետ Արա Ֆիտանեանը:
«Ցաւօք, երբեմն ոստիկանութեան գործողութիւններում ականատես ենք լինում անհամաչափ ուժի կիրառման: Բոլոր դէպքերով մեր կողմից իրականացւում են համապատասխան ստուգումներ: Այս պահի դրութեամբ ունենք 47 ծառայողական քննութիւն, դրանցից ոմանք բազմադրուագ են: 47-ից 34 դէպքով էլ քրէական դատավարութեան օրէնսգրքին համապատասխան նախապատրաստուել են նիւթեր եւ յարուցուել քրէական գործեր:
Քաղաքացիների կողմից էլ կան բազմաթիւ դէպքեր, երբ ոչ-իրաւաչափ գործունէութիւն է իրականացւում: Այդ դէպքերի առնչութեամբ էլ ունենք 13 նիւթ: Շատ են դէպքերը, երբ ոստիկանութեան կիրառած առերեւոյթ անհամաչափ ուժը արդիւնք է քաղաքացիների սադրիչ գործողութիւնների:
Բազմաթիւ դէպքեր ենք արձանագրել, երբ վիրաւորական արտայայտութիւններ են հնչում ոստիկանների հասցէին, նաեւ հայհոյանքներ, ասեղով ծակում են ոստիկանութեան ծառայողներին, այնպէս են ծակում, որ չնկատուեն: Աչքի են ընկնում նաեւ առանձնայատուկ յարձակողական դրսեւորմամբ իգական սեռի ներկայացուցիչներ: Ֆրանսայի հրապարակում տեղադրուել է պատ, որտեղ ներկայացւում են ոստիկանների լուսանկարները: Այս ամէնը չի կարող ոստիկանների վրայ բացասական ազդեցութիւն չունենալ, այս ամէնի համագումարը երբեմն ծնում է վերաբերմունքը, որը երբեմն ոստիկանութեան աշխատակիցները դրսեւորում են: Սա չի արդարացնում նրանց, սակայն ոստիկանը նաեւ մարդ է», նշած է Ֆիտանեանը:
