Պոլսոյ մէջ օրերս տեղի ունեցած է միջ-վարժարանային արհեստագիտական ոլորտի ՝ «Սթիմ» ծրագրի մրցոյթ, որուն առաջին տեղը գրաւած են Գալֆայեան վարժարանի սաները։
Այդ մասին «Արեւելք» կարդաց՝ «Նոր Մարմարա» պարբերականէն եւ ստորեւ կը ներկայացնենք պարբերականի կողմէ հրապարակուած լրատւութիւնը։
Պէզճեան վարժարանի կազմակերպութեամբ 4 Յունիս Երեքշաբթի STEM մրցոյթին մէջ, Գալֆայեան վարժարանի STEM թիմը յաղթող հռչակուեցաւ: Այս մրցոյթին իրենց մասնակցութիւնը բերած էին 9 վարժարաններ:
Մրցումի ընթացքին աշակերտներէն կ՚ակնկալուէր ակնթարթային նախագիծերով արձագանգել գիտական գործունէութեան, որ կը չափէր տղոց լուծումներ ստեղծելու հմտութիւնները:
Կը շնորհաւորենք Գալֆաեանցի սանուհիները՝ Միրա Սոնա Ն., Պէրֆին Պ., Նորա Սելին Կ. եւ Եուլիանա Է., ինչպէս նաեւ անոնց խորհրդատու գիտութեան ուսուցչուհի՝ Օր. Մելիսան, մաղթելով շարունակական յաջողութիւներ։