ՀՀ սփյուռքի նախարարության նախաձեռնությամբ «Ստամբուլի հայ համայնքի օրերը Հայաստանում» ծրագրի շրջանակներում Արամ Խաչատրյան համերգասրահում երեկ կայացավ Ստամբուլի Սրբոց Վարդանանց եկեղեցու երգչախմբի համերգը՝ նվիրված Հայաստանի պետական ակադեմիական երգչախմբի գեղարվեստական ղեկավար և գլխավոր դիրիժոր, ԽՍՀՄ ժողովրդական արտիստ Հովհաննես Չեքիջյանի ծննդյան 90-ամյակին: Երգչախմբի խմբավարն է Ատրուշան Հալաջյանը, իսկ երգչախումբը 1909 թվականին Պոլսում հիմնված երգչախմբի ավանդույթներն է շարունակում:
Համերգին ներկա էին մաեստրո Հովհաննես Չեքիջյանը. կոմպոզիտոր, ՀՀ արվեստի վաստակավոր գործիչ, ՀՀ ժողովրդական արտիստ Տիգրան Մանսուրյանը, հյուրեր Թուրքիայից, այլ երկրներից:
Հնչեցին Կոմիտասի, Եկմայլանի, Էդգար Հովհաննիսյանի ստեղծագործություններից, ինչպես նաեւ դասական օպերային արվեստից:
ՀՀ սփյուռքի նախարարի տեղակալ Սերժ Սրապիոնյանը ընթերցեց նախարար Հրանուշ Հակոբյանի ողջույնի խոսքը, ինչպես նաեւ խմբավարին եւ երգչախմբի մենակատարներին պարգեւատրեց մեդալներով:
Համերգին օրհնության գիր էր հղել Պոլսո պատրիարքական տեղապահ Գարեգին արք. Բեքջյանը: