0.09c
Երեվան
հնգ, դկտ 12
Լիբանանի հայկական առաջատար վարժարաններէն համարուող Պէյրութի հայ Կաթողիկէ Մեսրոպեան վարժարանին մէջ օրերս տեղի ունեցած է միշտ ալ հրատապ թեմայ հանդիսացող թմրամիջոցներու օգտագործման դէմ պայքարին մասին շահեկան դասախօսութիւն մը, որուն մասնակից դարձած են աշակերտութեան ծնողները։
Այդ մասին «Արեւելք» վերահասու դարձաւ Մեսրոպեան վարժարանի համացանցի խումբէն, ուր մասնաւորապէս գրուած է
Կազմակերպութեամբ եւ հրաւէրով Հայ կաթողիկէ Մեսրոպեան բարձրագոյն վարժարանի Ուղորդումի եւ խորհրդատուութեան բաժանմունքին, Oum El Nour կազմակերպութեան աշխատակցուհի, հոգեբան Մարիամ Հըպըր 13 Մարտ 2024-ին հանդիպում մը ունեցաւ վարժարանի միջնակարգի, երկրորդականի եւ Արուեստիցի աշակերտներու ծնողներուն հետ, խօսելու համար թմրամիջոցներու չարաշահման երեւոյթին մասին:
Տիկին Հըպըր հաստատեց, որ թմրամիջոցներու չարաշահումը լայնածաւալ խնդիր մըն է մեր հասարակութեան մէջ, անհատներու, ընտանիքներու եւ հասարակութեան վրայ իր կործանարար հետեւանքներով, յատկապէս դժուար ժամանակներու մէջ: Ան ըսաւ, որ ծնողները, որ ունին պատանի տարիքի զաւակներ, պէտք է հասկնան այդ տարիքի ֆիզիքական եւ հոգեբանական առանձնայատկութիւնները եւ ըստ այդմ վարուին անոնց հետ: Հոգեբանը զգուշացուց, որ ծնողներու կողմէ յախուռն եւ չմտածուած քայլերը կրնան օտարացնել իրենց զաւակները, ինչ որ պատճառներէն մէկն է, որ անոնք տարուին մոլութիւններով: Այս առիթով, տիկին Հըպըր ներկայացուց շարք մը ձեւեր, որոնք կրնան օգտակար ըլլալ ծնողներուն հետեւելու համար իրենց զաւակներու առողջ վարքագիծին:
Ծնողները բազմաթիւ հարցումներ ուղղեցին բանախօսին եւ արտայայտեցին իրենց ցանկութիւնը այն մասին, որ այս եւ նման նիւթերու շուրջ դարձեալ հանդիպումներ կազմակերպուին դպրոցին մէջ:
Նշենք, որ մօտակայ օրերուն նոյն նիւթով դասախօսութիւն մը պիտի ներկայացուի նաեւ 7-12-րդ դասարանի աշակերտներուն:
1989-ին հիմնադրուած Oum El Nour կազմակերպութիւնը նպատակ ունի աստիճանաբար նուազեցնել թմրամիջոցներէ կախեալութեան մակարդակը Լիբանանի մէջ եւ բարձրացնել իրազեկուածութիւնը տարբեր գործօններու մասին, որոնք ուղղուած են այդ նպատակին:
