24c
Երեվան
երկ, հնս 29
Հայաստանի Հանրապետութեան մէջ Հաւաքական անվտանգութեան պայմանագրի կազմակերպութեան (ՀԱՊԿ) խաղաղապահ զօրավարժութիւն կայացնելը այս իրավիճակին մէջ նպատակայարմար չենք համարեր։ Այս մասին այսօր՝ 10 յունուարին, լրագրողներու հետ հանդիպման ժամանակ ըսած է ՀՀ վարչապետ Նիկոլ Փաշինեանն՝ անդրադառնալով Հայաստանի մէջ ՀԱՊԿ խաղաղապահ զօրավարժութիւններ կայացնելու որոշման։
«ՀՀ պաշտպանութեան նախարարը ՀԱՊԿ միաւորուած շտաբին գրաւոր տեղեկացրել է, որ մենք Հայաստանի Հանրապետութիւնում նման զօրավարժութիւններ անցկացնելը այս իրավիճակում նպատակայարմար չենք համարում։ Այդ զօրավարժութիւններն այս տարի չեն կայանայ»,- նշած է Փաշինեան։
Անոր խօսքով, Հայաստանի ձեւաւորման գործընթացին մէջ անկիւնաքարային եղած է միտքը, որ Ռուսիոյ Դաշնութիւնը Հայաստանի անվտանգութեան ոլորտի թիւ մէկ դաշնակիցն է եւ անվտանգութեան երաշխաւորը. «Պէտք է ասեմ, որ մենք նոյնպէս հարցն ընկալել ու ընկալում ենք այդպէս: 2020-ի 44-օրեայ պատերազմից յետոյ մեր առաջնային մտահոգութիւնը եւ օրակարգը առաջին հերթին Ռուսիոյ Դաշնութեան հետ եղել է հետեւեալը, որ մենք մտավախութիւն ունենք, որ Ադրբեջանը ագրեսիւ գործողութիւններ կը ձեռնարկի ՀՀ միջազգայնօրէն ճանաչուած տարածքի նկատմամբ: Սա եղել է Ռուսիոյ Դաշնութեան հետ մեր հաղորդակցութեան հիմնական թեման: Իմ կարծիքով այդ խօսակցութիւնը եղել է շատ կոնկրետ, այդ խօսակցութիւնների արդիւնքում մենք ստացել ենք պաշտօնական հաւաստիացումներ, որ ՀՀ սահմանները կարմիր գիծ են անվտանգութեան ոլորտի մեր դաշնակիցների, գործընկերների համար:
Երբ տեղի են ունեցել 2021-ի մայիսի իրադարձութիւնները Սոթք-Խոզնավար հատուածում, ներխուժումը ՀՀ տարածք, մենք բնականաբար, ակնկալել ենք կոնկրետ գործողութիւններ Ռուսիոյ Դաշնութեան մեր գործընկերներից: Ի պատասխան մեր հարցումների եւ դիմումների, ստացել ենք դիտարկում այն մասին, որ Հայաստանի եւ Ադրբեջանի միջեւ սահմանները դեմարկացուած չեն: Այս առնչութեամբ առաջացել է բովանդակային հակասութիւն, այդ դէպքում որտեղով է անցնում այն կարմիր գիծը, որն արդէն մենք միջպետական յարաբերութիւններում արձանագրել ենք: Այս համատեքստում շատ կարեւոր է դարձել այդ հարցի պատասխանը մեր հետագայ յարաբերութիւնների կառուցման համար: Այդ կարմիր գիծը դե յուրե գոյութիւն ունի, եւ դա ՀԱՊԿ պատասխանատւութեան գօտին է մեր տարածաշրջանում, մասնաւորապէս ՀՀ-ում»,-յայտարարած է Փաշինեան:
«Երեւանում կայացած գագաթաժողովում Հայաստանի առաջադրած հիմնական խնդիրը այն է, որ ոչ միայն տեսականօրէն, այլեւ գործնական խնդիր ունենք ի ցոյց դնելու եւ հասկանալու, թէ որն է ՀԱՊԿ պատասխանատւութեան գօտին ՀՀ-ում: Մենք ասել ենք, որ առանց այս գծի արձանագրման մենք որեւ այլ փաստաթղթի ընդունում չենք պատկերացնում: Այս խօսակցութիւնը չի աւարտուել եւ շարունակում է մնալ մեր օրակարգային հարցը»,-աւելցուցած է վարչապետը:
